Raymond Balzan ta’ 64 sena minn Bormla nżamm arrestat wara li ġie mixli li pprova jdaħħal f’pajjiżna mat-tliet kilogrammi droga eroina.
Huwa kien arrestat tard l-Erbgħa filgħaxija fl-Ajruport Internazzjonali ta’ Malta mal-wasla tiegħu b’titjira minn Brussell fil-Belġju.
Il-Pulizija kienet waslitilha informazzjoni li kien hemm xi persuni abbord it-titjira li kienu se jippruvaw idaħħlu d-droga f’pajjiżna.
Minn tfittxijiet li saru mill-pulizija, assistiti mill-uffiċjali tad-Dwana, fil-bagalja tal-imputat, f’qiegħ falz, instab pakkett kbir li fih allegatament kien hemm id-droga, b’valur fit-triq ta’ madwar €600,000.
Balzan tressaq quddiem il-Maġistrat Nadine Lia mixli b’assoċjazzjoni, importazzjoni u traffikar tad-droga eroina. Huwa kien mixli wkoll li kellu fil-pussess tiegħu l-imsemmija droga li nstabet f’ċirkostanzi li juru li ma kinitx għall-użu esklussiv tiegħu.
Huwa wieġeb mhux ħati tal-akkużi miġjuba kotra tiegħu iżda baqa’ jinżamm arrestat wara li ma saret l-ebda talba għall-ħelsien mill-arrest tiegħu. Il-Qorti laqgħet ukoll it-talba tal-Prosekuzzjoni biex jiġu ffriżati l-assi kollha tal-imputat.
Il-Prosekuzzjoni tmexxiet mill-Ispettur Marshal Mallia. L-Avukat Joe Brincat deher għal Balzan.
