Apparat speċjalizzat li ngħata lil tifel ta’ 10 snin minħabba ċirkostanzi ta’ viżta qed ikun ta’ għajnuna kbira għalih fil-ħajja edukattiva u anke dik personali.
Din hija l-istorja ta’ Thiago, li L-Orizzont fl-aħħar jiem iltaqa’ miegħu u m’ommu Marylis Mallia fejn magħhom tkellimna dwar l-għajnuna li huma sabu mill-Malta Trust Foundation.
Marylis bdiet billi qalet li binha għandu kundizzjoni magħrufa bħala benign intracranial hypertension, li tikkawża pressjoni fil-moħħ u fin-nerv ta’ wara l-għajn.
Qalet li l-Malta Trust Foundation kienu provdewlhom apparat speċjalizzat li għen lil Thiago biex ikun jista’ jara l-kliem u jaqra aħjar u anke laptop biex ikun jista’ jikkomunika aħjar ma’ sħabu tal-iskola.
“Nirringrazzjaw mill-qalb lill-Fondazzjoni għax bis-saħħa tagħhom Thiago mexa ħafna ‘l quddiem anke skolastikament,” qalet Marylis. “Milli nara minn features oħra, ikun hemm tfal bl-awtiżmu ma kinux jitkellmu u dan l-apparat jagħmel differenza kbira fil-ħajja tagħhom.”
U issa li Thiago qed juża dan l-apparat kif qed iħossu? Bi tbissima fuq wiċċu huwa jgħidilna li l-apparat qed ikun ta’ għajnuna kbira għalih u ta’ dan irringrazzja lill-Malta Trust Foundation u anke lill-President Emeritu Marie Louise Coleiro Preca, li hija wkoll il-fundatriċi u Ċerpersin ta’ din il-Fondazzjoni.
Fl-aħħar nett, ommu ħeġġet lin-nies biex ikomplu jagħtu d-donazzjonijiet tagħhom lill-Malta Trust Foundation għaliex “qiegħda tagħmel ġid kbir.”
Sadanittant, Marylis fakkret ukoll il-memorja tal-maħbub binha l-ieħor Ramiro, li ddeskrivietu bħala persuna li kien jaħseb f’kulħadd u li għalih il-familja kienet tiġi l-ewwel u qabel kollox. Ramiro, li kien fieq mill-kanċer, kien tilef ħajtu f’inċident sfortunat sentejn ilu.
Marylis u Thiago se jkunu qed jieħdu sehem ukoll waqt il-maratona ġbir ta’ fondi b’risq il-Malta Trust Foundation li se ssir is-Sibt 20 ta’ Mejju u li se tixxandar fuq l-istazzjonijiet televiżivi kollha bejn il-11.00 a.m. u l-11.00 p.m.
Sa issa l-Fondazzjoni diġà tat aktar minn 300 apparat speċjalizzat lil tfal li għandhom problemi fil-viżta jew li ma jitkellmux, liema apparat qed ikun ta’ għajnuna kbira għalihom biex ikunu jistgħu jikkomunikaw aħjar.
