Għadd ta’ ħaddiema fi Triq l-Ifran fil-Belt Valletta kellhom jevakwaw mill-uffiċini fejn jaħdmu wara li żviluppaw nirien.
Fil-post issejħu minnufih il-Pulizija u membri mid-Dipartiment tal-Protezzjoni Ċivili sabiex jikkontrollaw is-sitwazzjoni.
Għalkemm għall-ewwel kien hemm indikazzjoni li n-nirien setgħu żviluppaw mill-ħanut li jinsab taħt l-uffiċini aktar tard irriżulta li n-nirien kienu żviluppaw minn Airconditioner fl-ewwel sular tal-binja.
B’xorti tajba ħadd ma weġġa’ u s-sitwazzjoni ġiet kkontrollata f’ħin qasir.
