B’kollox hemm 78 Maltin li qed jiffurmaw parti mit-tim tal-film Amerikan bit-titlu ‘Not Without Hope’ li nġibed f’pajjiżna.
Il-film, li fih qegħdin jieħdu sehem Zachary Levi, Jessica Blackmore, James Martin Kelly, u Leeshon Alexander, kien iffilmjat kollu kemm hu f’Malta. L-istorja ġiet adattata mir-rumanz ta’ Nick Schuyler u Jere Longman li kiseb suċċessi kbar.
Artisti Maltin se jkunu qegħdin jikkontribwixxu f’xogħol addizzjonali issa li tlestiet il-produzzjoni tiegħu.
Waqt żjara fuq is-set tal-produzzjoni, il-Kummissarju tal-Films ta’ Malta Johann Grech iddikjara li “L-industrija tal-films qed ikollha impatt kbir fuq l-ekonomija Maltija. Aktar Maltin qed jaħdmu fl-industrija tal-films. Aħna nimmiraw li nkomplu nsaħħu l-ħiliet tan-nies tagħna biex nkunu nistgħu noffru l-aqwa livell li jżid il-valur għall-prezz imħallas. Aħna impenjati li ninvestu ħafna fl-edukazzjoni tat-tfal tagħna biex niżguraw li jkollhom futur aħjar f’din l-industrija.”
Il-film jirrakkonta dwar grupp ta’ ħbieb mitluqin fuq il-baħar wara li d-dgħajsa tas-sajd tagħhom inqalbet barra mill-kosta tal-Messiku.
Michael Jefferson, Kia Jam, Adam Beasley, u Rick French qed iservu bħala produtturi fuq dan il-film, li qed jiġi dirett minn Joe Carnahan.
Fornitur tas-Servizzi Lokali FPSM Ltd. qed jikkontribwixxi wkoll bl-għarfien espert tiegħu f’dan il-proġett.
