Attivist tal-motorsports jifhem is-sentiment ta’ veterani li ilhom snin jitkarrbu
“Minkejja li bl-impenji tal-familja u ħinijiet twal ta’ xogħol u minħabba impenji ta’ negozju li mmexxu jien u ħija, il-motorsports dejjem kellu post speċjali f’ħajjitna”. Hekk beda biex jgħid magħna Charles Galea, f’intervista ma’ dan il-ġurnal. Galea qalilna li llum b’xorti tajba bħala dilettanti tal-motorsports, dawk li tilgħin qegħdin isibu tmexxija li qiegħda temmen dejjem aktar fihom.
Charles qalilna li minn dejjem kienet x-xewqa tiegħu li jara lil uliedu jitrawmu f’dan l-isport u saħansitra wasal biex isemmi lil Ibnu għas-sewwieq Petter Solberg; sewwieq deskritt minnu bħala mudell minħabba t-taħlita ta’ kapaċità u umiltà fit-trakka.
“Nieħu gost insuq imma l-aktar meta nerbaħ”
Tkellimna anke maċ-ċkejken Solberg li minkejja li għad għandu biss erba’ snin irnexxielu jikser ir-rekord tiegħu fit-trakka tal-karting wara li għamel track record ta’ 57.27 s biex kiser it-track record tiegħu stess ta’ 58.20 s.
Minkejja li għad għandu biss erba’ snin, huwa determinat li jibqa’ jiffoka fuq il-karting u b’ċertu determinazzjoni qalilna li għalkemm iħobb isuq, jieħu ħafna gost meta jirbaħ u jaspira li la jkompli jżid il-livell ikun jista’ jikkompeti fuq livell internazzjonali.
“Kif għidtilhom sħabi nħasdu iżda ferħuli fl-istess ħin”
Minbarra Solberg, kellmitna wkoll oħtu, Delcine li fl-età ta’ 11-il sena, minkejja li għad ilha ssuq biss ftit ġimgħat diġà qiegħda turi potenzjal fit-trakka tal-karting.
Delcine qalitilna li meta tkellmet ma’ sħabha dwar l-isport li kienet qabdet, ħafna baqgħu maħsudin, iżda fl-istess ħin ħadu ħafna interess anke minħabba li hija tagħmel xi ħaġa differenti ferm minn delizzji oħra assoċjati aktar mat-tfajliet bħalma huma l-kant u ż-żfin pereżempju.
“Il-karting huwa l-bażiku biex issir sewwieq tajjeb u tifhem il-karozza”
Charles Galea
Galea qalilna li min hu dilettant u se jkun qiegħed jaqra din l-intervista jista’ jiftakar b’nostalġija, għalkemm b’ċertu sodisfazzjon ukoll, dak li għaddew minnu bħala dilettanti.
Charles spjegalna li l-imħabba tiegħu għall-motorsports bdiet fl-Awstralja meta kien jattendi attivitajiet hemmhekk ma’ missieru. Meta ġew Malta u beda jitfarfar, Galea dak iż-żmien xtara karozza sportiva u beda jipprattika bir-riżorsi li kien hawn dak iż-żmien. “Dak iż-żmien Hyundai Accent GT kienet xi ħaġa tajba, illum iż-żgħażagħ tal-lum żgur mhux se jikkuntentaw b’xi ħaġa hekk anzi jmorru għal xi ħaġa ħafna aktar lussuża u b’saħħitha”, kompla jgħidilna.
Barra minn hekk ir-Rabti qalilna li dak iż-żmien ma kienx hawn għajnuna biex issuq xi dixxipplina u l-unika attività li kien hawn kienu l-kwart ta’ mil u xi Hill Climb. Iżda kif kiber daqsxejn ħuh u ġab il-liċenzja xtara karozza aktar b’saħħitha u ddeċidew li jipprova jtellaq biha. Ħuh David Galea kien isuq b’Subaru Impreza STI u meta saq l-ewwel tlielaq setgħu jinnutaw li kellu potenzjal bħala sewwieq; “biex ngħid hekk kien mar tajjeb ħafna u l-fatt li hu tajjeb wara l-isteering u kompetittiv ħafna, wassal biex illum hawn toroq li fihom għandu l-aħjar ħin fejn tidħol karozza bis-saqaf f’attivitajiet organizzati”, kompla Galea.
“Tellieqa tinkludi pakkett sħiħ warajha mhux is-sewwieq biss”
Kompla jgħidilna li hu ġieli saq ukoll, iżda prattikament hu aktar jatribwixxi lilu nnifsu mas-suċċess ta’ ħuh. Missierhom Vince, minkejja li kien hu stess li rawwamhom f’dan l-isport, ma kinitx faċli għalih jaċċetta li jara lil David isuq b’ċertu veloċità. Is-suċċess ta’ sewwieq għal min ma jifhimx huwa individwali pero, warajh ikun hemm tim; li jista’ jkun żgħir jew kbir, li l-importanza tagħhom hi li jkunu jemmnu fil-kapaċitajiet tagħhom, tal-karozza u li jafdaw b’għajnejhom magħluqin lis-sewwieq innifsu.
“L-irwol tiegħi fis-suċċess ta’ ħija kien li nara li dejjem ikompli jitjieb. Sibna għajnuna mingħand mekkaniks oħrajn ukoll. Konna nagħmlu riċerka biex nagħżlu l-parts. It-tuning tal-ecu wkoll huwa kruċjali u dawn l-għażliet kollha u l-engine tuning huma bħal pakkett sħiħ li jekk ikollok xi ħaġa nieqsa ma tkunx tista’ tikkompeti biex tirbaħ”, kompla jispjega Charles.
“Qatt ma konna rikonoxxuti… illum l-istorja nbidlet”
Mistoqsi dwar l-iżvilupp li ra matul dawn l-aħħar snin, Galea qalilna li hu kien għamel żmien anke fil-kumitat tal-Hill Climb u l-ewwel ħaġa li nnota kienet li kien hawn ħafna toroq li fihom kienu jsiru tlielaq li twaqqfu. Ir-raġuni kienet waħda sempliċi, it-toroq kienu spiċċaw u ma baqgħux tajbin biex jinstaqu vetturi fihom.
Dak iż-żmien kien avviċina lis-Sindku Sandro Craus u bħala kumitat kienu għamlu talba biex isir xi ħaġa biex ikunu jistgħu jerġgħu jsuqu l-Imtaħleb. Dak iż-żmien bil-ftit fondi li kellu l-Kunsill kien daħal biex jirranġa t-triq tal-Imtaħleb u ġiet aċċessibbli għas-sewwieqa. Minkejja dan is-sewwieqa ħassew li kien fadal ħafna xi jsir biex is-sewwieqa Maltin ikunu jistgħu jaraw x’joffru sewwieqa oħra f’pajjiżna. Dan ma kienx possibbli b’dak il-livell ta’ toroq.
Bħala klabb dak iż-żmien kienu ressqu l-ilment tagħhom li kellu jsir investiment fil-Hill Climb anke minħabba l-potenzjal tas-sewwieqa involuti.
F’Settembru tal-2018, il-Ministru għall-Infrastruttura u l-Proġetti Kapitali Ian Borg flimkien mas-Segretarju Parlamentari għall-Isport Clifton Grima inawguraw proġett b’investiment ta’ aktar minn nofs miljun euro fejn fost affarijiet oħra żdiedet is-sigurtà bl-installazzjoni ta’ 360 metru ta’ crashbarriers u l-użu ta’ materjal apposta u titjib fis-servizzi tal-ilma.
“Il-veterani ma tagħtihomx tort ma jemmnux wara aktar minn 50 sena jitkarrbu”
Rigward l-aħħar aħbar b’rabta mat-twettiq tal-proġett tat-trakka tal-karozzi u l-muturi b’ investiment ta’ aktar minn €20 miljun, Charles qal li hemm reazzjonijiet imħallta. Huwa spjegalna li llum l-veterani għadhom mhumiex jemmnu għax dawn in-nies ilhom aktar minn 50 sena jitkarrbu u baqgħu jistinkaw u minkejja li raw studji u pjanti, qatt ma twettqet il-ħolma tagħhom. Galea qal li hu dak li tħabbar fl-aħħar ġimgħat huwa sostanzjat minn xhur ta’ ħidma ta’ nies professjonali li huma inkarigati minn dawn l-attivitajiet.
Rigward jekk jarahiex possibbli li jaħdmu dawn il-ħaddiema kollha msemmija fil-pjan imressaq, fejn hu stmat li se jaħdmu madwar 220 persuna fuq bażi full time, Charles qalilna li jekk issiefer barra tifhem aħjar kemm trakka ta’ dan il-livell tirrikjedi xogħol. Dan se jkun proġett sportiv u turistiku fl-istess waqt u b’hekk minbarra l-manutenzjoni bħalma huma dwal u teknoloġiji oħra, persuni oħra jridu jieħdu ħsieb li jżommu l-ambjent tal-madwar, inkluż tisbiħ tal-post, fl-aħjar kundizzjoni possibbli għax kif ngħidu l-ewwel ma tiekol l-għajn.
Mitlub jikkonkludi bil-ħsieb tiegħu b’rabta ma’ dawn l-investimenti, Galea qal li “Jiena Charles Galea, iva nemmen li din it-trakka se ssir, se ssir għax jien rajt b’għajnejja u missejt b’idejja l-proġetti ta’ dan il-gvern. Barra minn hekk din it-trakka se tkun il-post ideali għall-barranin li se jkollhom jiġu biex jitħarrġu pajjiżna minħabba l-kundizzjonijiet metereoloġiċi ta’ pajjiżna. Fi żminijiet fejn f’pajjiżhom se jesperjenzaw kundizzjonijiet li ma jippermettux li jsuqu, pajjiżna jrid iwassal il-messġġ li hawnhekk saret qabża kbira fil-motorsports u b’hekk ikun għaqli li dawn jinvestu f’taħriġ f’pajjiżna”.