“Qiegħda ninżel għarkupptejja quddiemek għax qatt ma emmint f’xejn iktar milli emmint fina t-tnejn”. Dan kien il-kliem li seraq ix-xena waqt l-attivitajiet li fetħu ċ-ċelebrazzjonijiet tal-EuroPride f’Għawdex ilbieraħ filgħaxija. Waqt spettaklu mimli kuluri u wirjiet minn kantanti bravissimi lokali, Oriana dehret tinżel għarkupptejha quddiem Steph u f’erba’ kelmiet mħejjija sew qalitilha li kien ilhom jitkellmu dwar ix-xewqa li jingħaqdu fiż-żwieġ u għalhekk iddeċidiet li tkun hi li tieħu dan il-pass tant importanti f’ħajjithom.
Steph min-naħa tagħha dehret deċiża ferm tant li mingħajr pawża weġbitha lura “ovja li rrid” sakemm il-folla tan-nies preżenti nfexxet iċċapċap f’mument mill-isbaħ li fih kompla joħroġ is-sinifikat tal-imħabba li wara kollox huwa l-motiv ta’ dawn l-attivitajiet li qiegħed jospita pajjiżna.
Minn qalbna nawgurawlhom futur mill-isbaħ flimkien.
