Wasalna lejn tmiem ta’ sena oħra, perjodu li normalment fih napprezzaw iżjed dak kollu li nkunu għaddejna minnu matul is-sena u nagħrblu ftit xi stajna nagħmlu aħjar biex tkun sena aħjar. Sfortunatament din mhix ir-realtà ta’ kulħadd. F’intervista ma’ dan is-sit Christine Schembri spjegatilna dwar kif wara 22 sena ta’ tbatija, qalb żmien li kienet irrassenjat ruħha li ma kellhiex wisq aktar ħajja. Għal dawk is-snin kollha hi u s-sieħeb tagħha spiċċaw jeżistu u mhux jgħixu filwaqt li kienu mħassbin kif setgħu jiġġieldu l-marda ta’ Christine.
Christine kienet tgħix ħajja normali bħal kulħadd sakemm ta’ 28 sena, minn testijiet komuni li għamlet, irriżulta li kellha kumplikazzjonijiet fil-fwied. Kellu jkun proprju perjodu ta’ tqala li jwassal biex il-mara tinduna li kellha problema. L-aħbar it-tajba hija li fortunatament, it-tarbija f’dik it-tqala twieled b’saħħtu u llum huwa wkoll ġuvni b’saħħtu.
Dak iż-żmien il-kura tas-saħħa kienet għadha ma għamlitx l-avvanzi tal-lum u għall-ewwel il-professur kien qiegħed isostni li l-kumplikazzjonijiet fil-fwied kienu ġejjin minn vizzju tal-alkoħol. Il-professur dak iż-żmien baqa’ jinsisti dwar dan u saħasitra kellha tkun Christine li tirrifjuta li tidħol programm tas-Sedqa, ovjament għax hi lanqas biss kienet tixrob.
Wara xi xhur hija għaddiet taħt professur ieħor u minn iżjed testijiet irriżulta li kellha ‘Budd-Chiari Syndrome’ u ftit li xejn kellha x’tagħmel għajr li tistenna donatur. Il-proċedura mhix waħda faċli biex tniżżila. Sfortunatament minħabba li d-domanda għall-fwied hija kbira ħafna, tingħata prijorità lil dawk li jkunu f’sitwazzjoni gravi ħafna. L-intervent mhuwiex xi wieħed faċli. Meta persuna tagħżel li tkun donatur, hemm ċertu organi, bħalma huwa l-fwied, li ma jistax jiġi trasferit f’każi fejn il-persuna li tmut ikun ilha ċertu ħin li mietet. Barra minn hekk, għandek persuni oħrajn li minkejja li joffru l-organi, l-organi tagħhom ma jkunux tajbin biex jingħataw ħajja f’ħaddieħor minħabba l-ammont ta’ ħsara li tkun saritilhom.
Rigward dak iż-żmien, Christine qalitilna li għaliha l-Malta Community Chest Fund huma “qaddisin”. Spjegatilna li kellha tagħmel sentejn u xahar f’Londra. Mhux biss, magħha kellu jibqa’ wkoll is-sieħeb tagħha Lawrence Spiteri. Il-mara spjegat li mingħajr l-għajnuna finanzjarja mogħtija mill-fonadazzjoni, impossibbli biex tfaddal meta tkun marida. Dak iż-żmien li żviluppawlha l-kumplikazzjonijiet, kienet ppruvat tfittex xi xogħol. Kienet tipprova saħansitra ma ssemmix li kellha l-marda għax kienet taf li se ssib diffikultà, iżda meta kienet tintbagħat għat-testijiet mediċi kienu jgħidulha li se jibatu għaliha, iżda qatt ma jibatu. Dan wassal biex għal xi snin hija kellha saħansitra tiddependi mill-ftit għajnuna tal-benefiċċji u din xejn ma kienet tgħinna biex tasal titla Londra. Dak iż-żmien kien stmat li bejn wieħed u ieħor kellha bżonn madwar LM 29 kuljum biex titla għall-kura u hi damet aktar minn sentejn. Spjegat dwar kif meta fl-aħħar snin marret għall-operazzjoni u kellha konverżazzjonijiet ma’ pazjenti oħrajn li baqgħu skantati meta qalitilhom li f’pajjiżna għandna dan il-fond, li huwa ġej mill-ġenerożità tal-poplu kollu, li sena wara l-oħra jkompli jikber.
“Kont preparajt il-bottijiet biex inqassamhom fil-ħwienet … bdejt nitlob li tal-inqas ma nitlax”
Christine Schembri
Tkellimna wkoll ma’ Lawrence Spiteri, li huwa s-sieħeb ta’ Christine. Lawrence baqa’ viċin tagħha f’kull stadju tal-marda tagħha u kif qalilna hu stess kien hemm żmien fejn minħabba l-pandemija, tant kienet gravi Christine li lanqas seta’ jagħrafha meta bdew juruhielu minn fuq il-mobile. Qalilna b’qalbu maqsuma dwar iż-żminijiet diffiċli li għaddew meta kien ikollhom litteralment jisirqu ftit minuti biex jaraw lil xulxin minħabba ċertu restrizzjonijiet u anke dwar kif kienet taqsamlu qalbu meta tgħidlu li kienu marru bl-ajruplan ħdejn xulxin imma lura hu kien se jkun f’parti oħra tal-istess ajruplan għax hi kienet irrassenjata li ma kinitx se tgħix. Huwa rringrazzja wkoll lil Puttinu li fl-aħħar tmien xhur għenuhom ukoll b’appartament f’Sutton. Huwa li jaħdem bħala infermier f’pajjiżna xtaq jappella għal iżjed apprezzament għall-kura f’pajjiżna. Sostna li hawn nuqqas, liema nuqqasijiet se jkomplu jiżdiedu anke minħabba żieda fil-popolazzjoni, iżda meta tikkumpara l-istennija fit-Taqsima tal-Emerġenza ma’ sptarijiet barra mill-pajjiż tifhem aħjar kemm għandna servizz tajjeb. “Illum il-ġurnata għax persuna tistenna xi sigħat l-Emerġenza malajr tmur tiġri fuq Facebook… tal-biża’ sirna. Dak iż-żmien jien stess bqajt skantat. Għamilna aktar minn 12-il siegħa fi sptar f’Londra, id-demm kien tbaxxielha għal sitta, kienet mgħawġa ganġ bl-uġigħ u kulma qalulhom kien li kellhom jistennew li jiġi xi professjonist tal-fwied”, tenna jgħid magħna.
“Kont qtajt qalbi li se niġi lura ħajja … Għalija l-MCCF u Puttinu qaddisin!”
Christine Schembri
“Id-donazzjoni f’L-Istrina, hi kemm hi, hija investiment, għax ħadd u ħadd ma jemmen li jista’ jgħaddi minn dawk it-tbatijiet sakemm verament tirċievi l-aħbar… taħseb li jiġi bżonn kulħadd minbarra int”, kompliet tgħid Christine filwaqt li fakkret dwar il-ħafna każijiet ta’ persuni li qabel twaqqfu dawn il-fondi spiċċaw issalbu, bigħu l-proprjetajiet tagħhom u oħrajn li ma setgħux jaffordjaw jagħmlu dan il-pass għax lanqas biss kien ikollhom proprjetà tagħhom.
