Raġel ta’ 47 sena mill-Arġentina sofra ġrieħi serji wara inċident li seħħ għall-ħabta ta’ l-10.25am, fi scrap yard, fi Triq tal-Barrani, Żejtun.
Minn investigazzjoni preliminari rriżulta li waqt li r-raġel kien qiegħed jaqta’ l-ħadid b’apparat tal-gas, għal xi raġuni seħħet xi ħsara fl-istess apparat, bil-konsegwenza li l-ħaddiem sofra ħruq.
Fuq il-post issejħu membri mid-Dipartiment tal-Protezzjoni Ċivili u tim mediku mill-Isptar Mater Dei biex jassistu. Ir-raġel ittieħed l-isptar permezz ta’ ambulanza fejn aktar tard ġie ċċertifikat bi ġrieħi serji.
Bil-każ ġiet infurmata l-Maġistrat Dr Renata Farrugia LL.D li fetħet inkjesta, filwaqt li l-investigazzjonijiet tal-Pulizija dwar dan l-inċident għadhom għaddejjin.