Raġel u mara jinsabu arrestati b’konnessjoni mal-qtil ta’ Elle Edwards — il-mara li sofriet minn ferita f’rasha konsistenti ma’ ferita ta’ arma tan-nar f’pub f’Lejliet il-Milied.
Edwards (26 sena), mhux maħsub li kienet fil-mira tal-aggressur dakinhar li seħħ il-każ f’Lighthouse fil-villaġġ ta’ Wallasey, f’Merseyside.
Fis-sigħat li għaddew, il-Pulizija qalu li ż-żewġ suspettati jinsabu fil-kustodja tal-Pulizija fejn se jiġu interrogati dwar il-każ.
Ir-raġel (30 sena) minn Tranmere jinsab arrestat fuq suspett ta’ qtil u attentat ta’ qtil, filwaqt li t-tfajla (19-il sena) minn Rock Ferry hija suspettata b’kompliċità f’dan il-qtil.
