B’rebħa konvinċenti fis-60m sprint fil-Kampjonati tax-Xitwa organizzati minn Athletics Malta, Carla Scicluna ta’ Pembroke kisbet post fil-Kampjonati Dinjija Indoor li se jsiru fis-Serbja x-xahar id-dieħel. Scicluna, li rrappreżentat lill-pajjiżna fl-Olimpjadi f’Tokjo, rebħet din it-tellieqa b’ħin ta’ 7.67s. Fost l-irġiel, rebħa għal Luke Bezzina f’tellieqa kumbattuta maż-żagħżugħ emerġenti Beppe Grillo b’7.06s u 7.08s rispettivament.
Il-Kampjonati tax-Xitwa wasslu wkoll għal rekord nazzjonali ġdid, b’qabza spettakolari ta’ 4.35m fil-pole vault għal Nicolai Bonello (La Salle). Hekk kif dan l-atleta għadu relattivament ġdid f’din id-dixxiplina, Bonello jista’ jikseb standards ogħla f’dan l-avveniment. Peppijna Dalli (Pembroke Athleta) rebħet il-kompetizzjoni tan-nisa b’qabża ta’ 3.60m.
Bradley Mifsud u Luke Farrugia se jkunu qed ixejru l-bandiera Maltija fil-Kampjonati Ewropej tat-Tfigħ (European Throwing Cup) fil-Portugall wara prestazzjoni mill-aqwa fil-Kampjonati tax-Xitwa fil-Marsa fi tmiem il-ġimgħa. Huma kienu mifruda biss b’żewġ metri fid-discus, b’Mifsud ta’ Pembroke jegħleb lill-Farrugia ta’ Rush b’51.50m għal 49.60m, riżultat li jikkwalifka lit-tnejn. Mifsud iċċelebra tripletta mill-aqwa meta rebaħ ukoll ix-shot put u l-javelin. Magħhom se jingħaqdu Mireya Cassar, li l-ġimgħa li għaddiet kisret ir-rekord nazzjonali fil-hammer throw u Luca Martini li ilu jiddomina x-xena lokali f’din id-dixxiplina għal numru ta’ snin.
Jenny Pace Hickey, eks-atleta Olimpika u eks-detentriċi ta’ rekord, waddbet 22.12m fid-dixxiplina preferita tagħha, il-javelin, u kisret ir-rekord tal-kategorija W60 fid-discus b’tefa’ ta’ 23.39m.
Janet Richard, ta’ Pembroke AC ukoll, rebħet it-300m bl-aqwa ħin tagħha ta’ 39.24s bl-atleti U18 u U16 Kay Testa (Pembroke AC) u Thea Parnis Coleiro (Rush) jiksbu riżultat rispettabbli minkejja d-differenza fl-età. Fost l-irġiel, rebħa għal Matthew Galea Soler (La Salle) b’ħin b’saħħu ta’ 35.32s.
Żurrieq Wolves iddominaw ix-xena fid-distanzi l-medji bi tliet rebħiet minn erba’ għall-atleti kkowċjati minn Kevin Galea. Jean Paul Debono rebaħ l-1000m irġiel f’2:34.11 –personal best għalih, filwaqt li fost in-nisa, l-atleta Mireya Bugeja, li għadha fil-kategorija tal-Under 16, rebħet f’ħin ta’ 3:04.20 u waqqfet rekord ġdid għall-kategorija tagħha.
Michela Caruana rebħet is-600m b’ħin ta’ 1:37.55, li wkoll kien personal best għaliha. Id-dominju ta’ Żurrieq fid-distanzji medji twaqqaf biss minn Christian Luke Chetcuti (Pembroke Athleta), li fuq din id-distanza rebaħ b’mod konvinċenti b’ħin ta’ 1:21.80, personal best ukoll għalih. Isaac Bonnici (Rush) spiċċa t-tieni, b’ħin ta’ 1:25.48 li huwa rekord fil-kategorija.
Dillon Cassar (Mellieħa AC) kompla jiddomina x-xena fuq l-itwal distanzi, b’rebħa fil-5000m f’ħin ta’ 14:52.46, quddiem Gabriel Farrugia. Roberta Schembri ħadet l-unur tal-iktar mara veloċi fl-itwal distanza fil-Pellikola, b’PB ta’ 17:34.85 fuq 5000m.
Jeremy Zammit (7.42m) u Claire Azzopardi (5.75m) rebħu l-unuri fil-long jump.
Wara bidu intensiv tal-istaġun, l-atleti tat-track and field issa jkomplu bit-tħejjija tagħhom għall-parti li jmiss tal-istaġun. Ix-xena tal-atletika Maltija issa tgħaddi mit-trakka għat-triq bil-Kampjonati Nazzjonali tal-5km li se jsiru Ħal Far. Ir-rotta hija waħda ċatta u veloċi, u għaldaqstant tipprovdi opportunità tajba biex jinkisru bosta rekords anke f’din id-dixxiplina.