Wara li beda jiġri madwar sena ilu, l-atleta Għawdxi tejjeb il-ħin personali tiegħu b’aktar minn għaxar minuti bejn il-maratoni ta’ Barċellona u Amsterdam.
Patrick Muscat kiseb riżultat impressjonanti fit-TCS Amsterdam Marathon 2026, fejn temm id-distanza ta’ 42.1 kilometru f’ħin ta’ sagħtejn, 47 minuta u 40 sekonda, biex kompla juri l-progress li għamel f’perjodu relattivament qasir fil-ġiri fuq distanzi twal.
Muscat, li jirrappreżenta lil Athletix A.C. Gozo, temm il-maratona fil-920 post minn madwar 33,500 parteċipant, fi prestazzjoni li tikkonferma l-iżvilupp tiegħu bħala atleta tal-maratoni.
L-avventura tiegħu fil-maratoni bdiet f’Marzu li għadda, meta pparteċipa għall-ewwel darba fil-Maratona ta’ Barċellona u waqqaf il-ħin ta’ 2:58:14. F’Amsterdam, seba’ xhur wara, irnexxielu jtejjeb dan ir-riżultat b’aktar minn 10 minuti, pass importanti fil-karriera sportiva tiegħu.
Dan il-progress huwa r-riżultat ta’ xhur ta’ ħidma intensiva, li kienu jinkludu ġirjiet kmieni filgħodu, distanzi twal, sessjonijiet ta’ taħriġ impenjattivi u sagrifiċċji biex ikun jista’ jkompli jtejjeb il-prestazzjoni tiegħu. Il-konsistenza, il-paċenzja u l-fiduċja fil-proċess tat-taħriġ kienu elementi ewlenin f’dan l-iżvilupp.
Muscat irrikonoxxa wkoll l-importanza tal-persuni li għenuh matul dan il-vjaġġ, fosthom il-coach tiegħu Charlton Debono, li mexxieh fit-taħriġ u fil-preparazzjoni, kif ukoll Athletix A.C. Gozo għall-appoġġ kontinwu tagħha.
Huwa rringrazzja wkoll lill-ġenituri tiegħu, Salvina u Thom, talli baqgħu dejjem maġenbu u tawh l-appoġġ tagħhom f’kull pass ta’ din l-avventura.
Għal Muscat, maratona mhijiex biss it-tlestija ta’ 42.195 kilometru f’ġurnata waħda, iżda r-riżultat ta’ xhur twal ta’ preparazzjoni, impenn u determinazzjoni.
Wara li Barċellona kienet il-bidu tal-vjaġġ tiegħu fil-maratoni, Amsterdam serviet bħala pass importanti ’l quddiem. B’dan ir-riżultat, Muscat jista’ jħares ’il quddiem b’aktar motivazzjoni biex ikompli jisfida l-limiti tiegħu u jtejjeb il-ħinijiet personali tiegħu fil-kompetizzjonijiet li ġejjin.
