Numru ta’ atleti żgħażagħ Maltin li jirrappreżentaw lil Rush Athletics Club irreġistraw prestazzjonijiet eċċellenti fil-London Indoor Games li saru fl-aħħar ġranet f’Lee Valley, fejn kisbu għadd ta’ rekords nazzjonali f’kategoriji differenti u riżultati mill-aqwa f’ambjent mill-aktar kompetittiv.
Total ta’ 31 atleta kienu f’Londra f’żewġ delegazzjonijiet differenti biex ħadu sehem f’dan l-appuntament ewlieni fil-kalendarju tal-atletika internazzjonali indoor.
L-ewwel delegazzjoni kienet tinkludi 16-il atleta fil-kategoriji akbar taż-żgħażagħ, bl-atleti ta’ Rush jiksbu riżultati mill-aqwa kemm f’termini ta’ prestazzjoni personali iżda wkoll fejn tidħol klassifikazzjoni fil-konfront tal-avversarji internazzjonali li ħadu sehem.
Thea Parnis Coleiro kompliet turi l-progress impressjonanti tagħha meta temmet fit-tieni post fil-200m, b’ħin mill-aqwa ta’ 24.91s, fejn wettqet rekord fil-kategoriji Under 18 u Under 20. Hija kellha riżultat eċċellenti anke fis-60m, tellieqa li temmet f’7.77s, prestazzjoni verament mill-aqwa għal atleta li għad għandha 16-il sena.
Fost il-ġuvintur, żewġ rekords għal Isaac Bonnici fil-kategoriji U20 u U23, meta rreġistra ħin straordinarju ta’ 1:56.55 fit-800m. L-atleta ta’ 18-il sena wera l-versatilità tiegħu meta ġera l-400m f’ħin ta’ 51.80s.
Rekord ukoll għal Kayleigh Anne Ellul fil-kategoriji Under 16 u Under 18 fis-60m hurdles, fejn uriet il-potenzjal tagħha f’din id-dixxiplina. Luca Gerada wkoll kellu prestazzjoni tajba, meta ġera s-60m f’7.18s.
Delegazzjoni oħra, li nkludiet 15-il atleta ta’ etajiet iżgħar, ukoll ipprovdiet sodisfazzjon kemm għal klabb kif ukoll għall-pajjiż. L-istilla emerġenti Leah Frendo kompliet timpressjona meta ġiet lura b’xejn inqas minn tliet rekords fil-kategorija tal-Under 14 indoor. Dawn jinkludu ħin ta’ 27.83s fil-200m, qabża ta’ 4.52m fil-long jump, u ħin ta’ 8.32s fis-60m sprint.
Fost is-subien, suċċess Malti fil-kapitali Ingliża hekk kif Andre Gauci rebaħ ix-shotput fil-kategorija Under 15 fejn kiseb ukoll l-aqwa riżultat fil-karriera tiegħu, u kiseb ukoll it-tielet post fi-800m. L-atleti l-oħra kollha li ħadu sehem kisbu personal bests f’din l-ewwel esperjenza internazzjonali tagħhom.
Iż-żewġ delegazzjonijiet f’Londra tmexxew mill-kowċis u uffiċjali tal-klabb Antonella Chouhal, Rachid Chouhal u Matthew Micallef.