Barcelona mmarkaw l-aħħar logħba tagħhom fin-Nou Camp sa Novembru 2024 b’rebħa komda ta’ 3-0 kontra Mallorca li fiha Ansu Fati skorja wara biss 49 sekonda.
Amath Ndiaye ta’ Mallorca tkeċċa fl-14-il minuta għal daħla perikoluża fuq iż-żagħżugħ Alejandro Balde.
Fati (24) irdoppja waqt li Gavi (70) issiġilla r-rebħa qabel ma Barcelona ġew ippreżentati bit-trofew ta’ La Liga wara t-tisfira finali.
Fl-istaġun li ġej iċ-champions se jirrilokaw fl-Istadium Olimpiku f’Montjuic waqt li n-Nou Camp jiġi żviluppat mill-ġdid.
Il-Blaugrana se jmorru lura d-dar fl-2024-25 b’attendenza ta’ 50%, qabel ma jitlesta x-xogħol matul l-istaġun 2025-26.
Sergio Busquets u Jordi Alba, li t-tnejn se jħallu l-club fis-sajf, ingħataw ovazzjoni mill-partitarji meta ġew sostitwiti fit-tieni taqsima.
Barca se jtemmu l-kampanja tagħhom f’Celta Vigo nhar il-Ħadd li ġej.
Ir-rivali Real Madrid kisbu rebħa ta’ 2-1 kontra Sevilla barra minn darhom bil-goals jiġu permezz ta’ Rodrygo (29, 69) li skorja doppjetta wara li Rafa Mir (3) kien fetaħ l-iskor għat-telliefa.
