Bayern Munich iffissaw il-prezz li jrid jitħallas għall-attakkant Pollakk, Robert Lewandowski, li huwa ta’ xejn inqas minn €40 miljun.
Lewandowski, 33 sena, għandu kuntratt fis-seħħ ma’ Bayern sas-sajf tal-2023 u l-pożizzjoni uffiċjali tal-club hija li se jwettaqha u qed jaħdmu biex iġedduhulu.
B’dan f’moħħhom Barcelona ġew marbuta ma’ mossa.
La Blaugrana huma ħerqana li jiksbu lin-numru disgħa tal-ogħla livell u peress li naqsu li jakkwistaw lil Erling Haaland jistgħu jmorru għal Lewandowski. Jekk jifilħuhx hija kwistjoni oħra. Iżda m’hemmx dubju li l-attakkant ikun kisba mill-aqwa.
Wieħed mill-aktar skorers letali fil-logħba Ewropea, Lewandowski skorja 47 goal fi 42 dehra fil-kompetizzjonijiet kollha għal Bayern s’issa dan l-istaġun.
