Il-club ta’ Benfica jinsab taħt investigazzjoni b’suspett ta’ korruzzjoni u ħasil ta’ flus.
Skond rapporti fil-media Portugiża, din l-allegata korruzzjoni tinfirex fuq medda ta’ żmien bejn l-2016 u l-2020 fejn il-membri tal-kumitat eżekuttiv minn dak il-perjodu u wara huma allegatament involuti.
Dan ġie żvelta sena u nofs biss wara li l-president tal-club, Luis Filipe Vieira, ġie mġiegħel jirriżenja.
Vieira ġie arrestat fuq akkużi relatati ma’ evażjoni tat-taxxa, frodi aggravata, falsifikazzjoni u ħasil ta’ flus.
Il-leġġendarju tal-club, Rui Costa, li ġie elett fil-post tiegħu kellu jara li tirrenja t-trasparenza.
Iżda skond rapporti, Costa huwa wkoll allegatament involut fl-investigazzjoni li ħarġet minn prosekuturi li aċċessaw bosta emails li fihom hemm evidenza biżżejjed biex dawn jitressqu quddiem il-qorti.
Il-club ta’ Benfica ħareġ stqarrija li kienet tgħid:
“Fil-każ li qed jiffaċċja l-club, jikkonferma li fit-3 ta’ Jannar, il-membri tal-bord tad-diretturi mill-2016 sal- 2020 u li bħalissa qegħdin fil-kariga, dehru quddiem il-qorti.
“Il-club mhux se jikkummenta aktar peress li l-proċess huwa taħt segretezza legali.
“Il-club jesprmi wkoll ir-rieda totali li jikkollabora mal-awtoritajiet kompetenti, kif dejjem ġara s’issa.”
Dan wara rapporti sensazzjonali lura fl-2018 li qalu li Benfica offrew prostituti lir-referees biex jingħataw “vantaġġ” waqt il-logħbiet tagħhom.
