Il-President tal-Istati Uniti Joe Biden assigura lill-Ukrajna li se tkun qed tirċievi mas- $60 biljun f’għajnuna militari.
Għalkemm din il-miżura għadha trid tgħaddi minn votazzjoni finali tal-Kungress, il-President Biden qal lil President Ukrenn Volodymyr Zelensky li jinsab kunfidenti li se tiġi approvata.
Zelensky għamel appell urġenti għal aktar armi sabiex tiġi evitata sitwazzjoni “katastrofika” fl-Ewropa.
Aktar kmieni din il-ġimgħa, is-Senat Amerikan approva pakkett ta’ għajnuna barranija ta’ $95 biljun, li jinkludi $60 biljun għall-Ukrajna.
Wara laqgħa li Biden kellu ma’ Zelensky matul il-jum tas-Sibt, f’kumment li ta lill-ġurnalisti, qal li l-poplu Ukren se jkompli jiġġieled b’tant kuraġġ u b’mod eroj. Żied jgħid li għalhekk huma importanti li l-Ukrajna tibqa’tingħata l-armi li għandha bżonn.
