Minn Cristian Muscat
Bormla rrepetew id-dominju ta’ tliet snin ilu meta rebħu ż-żewġ kategoriji tar- Regatta tal-Vitorja.
Huma rebħu Kategorija Open għall-21 darba b’vantaġġ ta’ 10 punti meta għelbu t-taqtiegħa kontra l-Isla li baqgħet sal-aħħar mumenti.
Il-Bormliżi rebħu Kategorija B għas-16-il darba b’vantaġġ ta’ 20 punt fuq l-Isla li fl-aħħar tiġrija ma pplejsjawx meta suppost kellha tkun taqtiegħa bejniethom.
KATEGORIJA OPEN
Din il-kategorija bdiet bit-tiġrija tad-Dgħajjes tal- Midalji li ntrebħet mill-Birgu b’vantaġġ ta’ nofs dgħajsa fuq dik tal-Isla li kienet segwita minn Bormla.
Sentejn ilu, din it-tiġrija ntrebħet mill-Marsa.
Il-club tal-Kalkara ddomina t-tiġrija tal-Frejgatini meta ħadu l-vantaġġ mat-tluq u baqgħu jżommuh sal-aħħar minkejja li lejn it-tmiem Bormla bdew jattakkaw, bit-tielet post jittieħed mill-Isla.
Sentejn ilu din it-tiġrija kienet intrebħet mill-Marsa.
Wara din it-tiġrija, Birgu baqgħu fl-ewwel post b’20 punti … b’vantaġġ ta’ erba’ punti fuq l-Isla quddiem Bormla (14) u Kalkara (12).
Bormla rebħu t-tiġrija tal-Pass ta’ Bi Tnejn b’mod mill- aktar komdu meta daħlu fl-ewwel pożizzjoni b’erba’ tulijiet quddiem l-Isla li għelbu lil Marsamxett fl-150 metru.
L-istess żewġ qaddiefa, Dennis Thornton u Clive Casha, żammew ir-rebħa ta’ sentejn ilu. Huma għamlu rekord ta’ 19-il rebħa konsekuttiva fiż-żewġ regatti.
B’din ir-rebħa l-Bormliżi qabżu fl-ewwel post b’34 punt quddiem l-Isla (28), Birgu (20), Kalkara (12) u Marsamxett (6).
It-tiġrija tal-Kajjikki kellha tmiem drammatiku meta l-Isla għelbu lil Bormla bi ftit ċentimetri wara li dawn tal-aħħar kienu fil-vantaġġ sa mill-bidu. Fit-tielet post daħlu l-Birgu.
Meta kien fadal it-tiġrija tal-Pass b’Erba’ Imqadef, id- differenza bejn Bormla u l-Isla kienet biss ta’ żewġ punti.
Sentejn ilu kienu Marsa li rebħu din it-tiġrija.
F’konfront dirett mal-Isla, Bormla rebħu l-aħħar tiġrija b’mod drammatiku meta għelbu lil Senglea fl-aħħar 100 metru hekk kif dawn tal-aħħar kienu qed igawdu l- vantaġġ.
Bormla rebħu wkoll dik tal-aħħar edizzjoni.
KATEGORIJA B
Kategorija B bdiet bit-tiġrija tal-Pass b’Żewġ Imqadef li ntrebħet minn Bormla, fejn kellha wkoll tintuża l-photo-finish biex ġie determinat li l-Isla għelbu lil Birgu għat-tieni post.
Fl-aħħar edizzjoni din it- tiġrija kienet intrebħet minn Birżebbuġa.
Il-tiġrija tal-Kajjiki ntrebħet mill-Isla fejn dak tal- Kalkara ngħata t-tieni post wara li dak ta’ Birżebbuġa ġie skwalifikat meta daħal fil-linja tal-Isla meta kien fadal 200 metru. B’din l-iskwalifikazzjoni, Bormla ngħataw it-tielet post (meta daħlu r-raba’).
L-Isla żammew l-ewwel post ta’ sentejn ilu.
B’dan ir-riżultat l-Isla u Bormla kienu qed jillidjaw il-klassifika b’24 punt kull wieħed.
It-tiġrija tad-Dgħajjes tal- Midalji ntrebħet minn Bormla li prattikament qatt ma ġew attakkati hekk kif żammew il-vantaġġ b’mod komdu fuq id-dgħajjes tal-Isla u tal-Birgu rispettivament.
Birżebbuġa kienu rebħu t-tiġrija ta’ sentejn ilu.
B’din ir-rebħa, it-total parzjali ta’ Bormla kien dak ta’ 44 fejn fetħu vantaġġ ta’ tmien punti fuq l-Isla biex it-taqtiegħa għar-rebħ tal-Aggregate Shield dehret li kienet se tkun bejniethom minħabba li l-Birgu kellhom 12-il punt u l-Kalkara 8.
Ir-raba’ tiġrija kienet dik tal-Frejgatini li ntrebħet mill-Isla li rebħu b’tul u nofs fuq id-dgħajjes ta’ Birżebbuġa u tal-Kalkara.
Sentejn ilu kienu Birżebbuġa li rebħuha.
B’din ir-rebħa, l-Isla qabżu fl-ewwel post bi 48 punt, erbgħa aktar minn Bormla li ma pplejsjawx. Fit-tieni post daħlu Birżebbuġa segwiti mill-Kalkara filwaqt li Marsa ġew skwalifikati.
L-aħħar tiġrija kienet dik tal-Pass b’Erbgħa Mqadef li ntrebħet minn Bormla biex rebħu l-Aggregate Shield, segwiti mill-Birgu u mill- Kalkara.
Fl-aħħar edizzjoni din it- tiġrija ntrebħet minn Birżebbuġa.
*Ir-Regatta bdiet bit-tiġrija tal-frejgantini tan-nisa fejn id-dgħajsa tal-Birgu, komposta minn Shazel Grima u Glyniss Mizzi, daħlet fl-ewwel post, f’ħin ta’ 5 minuti u 50 sekonda, li kienet segwita minn dawk tal-Isla u Bormla.
Ta’ min isemmi li Mizzi tgawdi rekord assolut li meta ħadet sehem f’din it-tiġrija dejjem ħarġet rebbieħa.
L-ekwipaġġi rebbieħa ta’ kull tiġrija huma:
Dgħajjes tal-Midalji – Birgu (Owen Zammit, Antoine Brignone, Wayne Xuereb, Sven Refalo).
Frejgatini – Kalkara (Clyde Mizzi, Davison Micallef u l-coxswain Gulia Vella).
Tal-Pass – Bormla (Clive Casha, Dennis Thornton).
Kajjikki – Isla (Nigel Sant, Christian Camilleri)
Tal-Pass ta’ b’Erbgħa – Bormla (Maximilian Mamo, Clive Casha, Dennis Thornton, Jurgen Camilleri).
Dawk ta’ Kategorija B intrebħu minn:
Tal-Pass ta’ bi Tnejn – Bormla (Charvon Gatt u Cleaven Falzon)
Kajjikki – Isla (Cayvon Gatt, Ericsen Lia).
Dgħajjes tal-Midalji – Bormla – (Dusty Cassar, Charvon Gatt, Cleaven Falzon, Yannick Pace).
Frejgatini – Isla (Owden Caruana Smith, Cayvon Gatt u l-coxswain Theon Pace).
Tal-Pass ta’ b’Erbgħa – Bormla (Elton Azzopardi, Charvon Gatt, Cleaven Falzon, Yannick Pace)
