Meta llum u għada tintlagħab id-disa’ ġurnata tal-BOV Kampjonat Premier, l-aqwa logħba ta’ tmiem il-ġimgħa hija dik bejn Gzira United u l-leaders Hamrun Spartans li qed jokkupaw l-ewwel żewġ postijiet.
Partiti oħrajn interessanti huma Birkirkara v Mosta u Marsaxlokk v Hibernians.
Gzira U. v Hamrun S. – Dan huwa konfront bejn iż-żewġ timijiet li għadhom mingħajr telfa.
Iżda Hamrun Spartans qed igawdu vantaġġ ta’ erba’ punti fuq Gzira United fejn jimmiraw li jiftħu vantaġġ komdu fil-quċċata tal-klassifika.
Filwaqt li l-Ispartans ġejjin minn rebħa ta’ 2-1 fuq Mosta, il-Maroons ġew miżmuma minn Valletta fi draw ta’ mingħajr goals u għaldaqstant jimmiraw li jirritornaw għar-rebħ biex iżommu l-pass mal-istess Spartans u jiftħu beraħ l-isfida tal-kampjonat.
Għalihom jirritornaw Nikolai Muscat u Clive Gauci minn sospensjoni iżda għat-tieni darba f’dan l-istaġun Lucas Carlos Riascos se jkun sospiż.
Min-naħa tal-Ħamruniżi, teżisti possibbiltá li jirritorna l-goalkeeper, Henry Bonello, minn injury.
Birkirkara v Mosta – Din hija partita mill-aktar delikata għal Birkirkara u xejn għajr minn rebħa ma tissodisfa l-kriterji tagħhom minħabba li ilhom ma jirbħu għal dawn l-aħħar tliet logħbiet u jinsabu ħames punti taħt il-leaders Hamrun Spartans.
Barra minn hekk, huma ġejjin minn telfa ta’ 1-0 kontra Marsaxlokk liema goal sofrewh tard fil-partita.
Mosta wkoll ġejjin minn telfa meta kellhom ibaxxu rashom quddiem Hamrun u għaldaqstant iridu jpattu għal dan id-diżappunt.
L-uniku player nieqes se jkun Alessandro Coppola ta’ Birkirkara li jinsab sospiż.
Zebbug R. v Floriana – Floriana jiffaċċjaw lit-team promoss ta’ Zebbug Rangers u huwa imperattiv li jiksbu t-tliet punti minħabba li issa ilhom erba’ logħbiet ma jirbħu biex jinsabu fid-disa’ post tal-klassifika.
Infatti l-aħħar rebħa tmur lura għall-10 ta’ Settembru meta kienu għelbu lil Valletta bl-iskor ta’ 1-0.
Peró, wieħed irid jgħid li fl-aħħar ħarġa tagħhom spiċċaw fi draw ta’ 0-0 kontra Balzan u ġew tliet darbiet imċaħdda mil-lasti.
Min-naħa tar-Rangers, ma jaffordjawx li jwaqqgħu l-punti hekk kif jinsabu fuq iż-żona tar-relegazzjoni u fil-periklu li jitilfu posthom.
Huma għandhom lil Randall Vella sospiż filwaqt li l-Greens se jkunu bl-aqwa formazzjoni.
Balzan v Valletta – Dan għandu jkun dwell mill-aktar interessanti.
Filwaqt li l-Balzanin spiċċaw fi draw ta’ bla goals fl-aħħar żewġ ħarġiet tagħhom, Valletta ġejjin minn erba’ telfiet konsekuttivi u draw. Dan ifisser li kisbu punt wieħed biss minn massimu ta’ 15.
Għalhekk iridu jagħrfu kif jirriorganizzaw biex jirritornaw għar-rebħ minħabba li l-qagħda tagħhom hija waħda prekarja li tista’ tiżvolġi f’waħda allarmanti.
Huma se jilagħbu kontra team li qed jisfida għal post fil-kompetizzjonijiet Ewropej u filwaqt li rebħa għal Balzan issaħħaħ posthom għall-objettiv tagħhom, telfa għall-Beltin tkompli tesponi l-kriżi li għaddejin minnha. Iżda rebħa tagħtihom nifs ġdid biex jitbiegħdu min-naħa t’isfel tal-klassifika.
Għalihom jirritorna Eslit Sala minn sospensjoni iżda Balzan se jkollhom jgħaddu mingħajr is-sospiż Ivan Bozovic.
Sta Lucia v Sirens – Sta Lucia jiltaqgħu kontra Sirens li huma l-uniku team li għadhom qed ifittxu l-ewwel rebħa.
Min-naħa l-oħra, il-Luċjani rreġistraw l-ewwel rebħa tal-istaġun meta għelbu lil Pietá Hotspurs bl-iskor ta’ 3-1.
Min-naħa tal-Pawlini, huma biss id-dell tal-istaġun li għadda u jidher li se jkollhom staġun diffiċli hekk kif inqabdu fin-naħa t’isfel tal-klassifika.
L-uniku player sospiż huwa l-goalkeeper ta’ Sta Lucia, Matthew Calleja Cremona.
Gudja U. v Pietá H. – Wara bidu tant tajjeb, Gudja United ħadu tliet skossi infila biex issa huma distakkati bi tmien punti mil-leaders tal-klassifika.
Għaldaqstant, din il-logħba tagħtihom iċ-ċans biex jirritornaw għar-rebħ meta se jilagħbu kontra t-team li huwa ankrat fil-qiegħ tal-klassifika. Peró fil-football ma hemm l-ebda teorija hekk kif il-Hotspurs jimmiraw għal sorpriża li għalihom jirritorna l-Ġappuniż, Takuma Yamaguchi, minn sospensjoni.
Min-naħa l-oħra, il-Gudjani għandhom tliet players sospiżi – Arthur James, Neil Anthony Micallef u Manuel Bartolo.
Marsaxlokk v Hibernians – Hibernians għandhom partita delikata meta jaffrontaw lil Marsaxlokk li bħalissa huma t-team tal-mument meta fl-aħħar erba’ logħbiet kisbu tliet rebħiet u draw.
Huma jinżlu b’moral għoli meta ġejjin minn rebħa ta’ 1-0 fuq Birkirkara.
Iżda min-naħa tal-Pawlisti għandhom l-elementi kollha neċessarji biex ikomplu jisfidaw u jiddefendu t-titlu.
Jekk ix-Xlukkajri huma t-team tal-mument, Jurgen Degabriele huwa l-player tal-mument … il-ġawhra Pawlista … hekk kif huwa l-aqwa skorer b’disa’ goals.
Marsaxlokk għandhom lil Juan Aguilar sospiż.
