Hekk kif illum kompliet l-inkjesta pubblika dwar il-qtil ta’ Daphne Caruana Galizia, kien imiss lill-Membru Parlamentari Ewropew David Casa li jagħti x-xhieda tiegħu. Casa qal li kien irċieva thedid wara li beda jfittex informazzjoni dwar 17 Black, il-kumpanija sigrieta tal-allegat mandant tal-qtil ta’ Caruana Galizia, Yorgen Fenech, kellu f’Dubaj.
Casa qal li beda wkoll jirċievi telefonati anonimi, li wħud minnhom kienu mill-Ażerbajġan.
Tenna li kien ra ittri mibgħutin mill-Gvern tal-Emirati Għarab Magħqudin, u li kienu indirizzati lill-Ministru Malti għall-Ġustizzja, liema ittri kienu jgħidu li talba għal assistenza b’rabta ma’ 17 Black ma kinitx kompluta.
Casa qal li l-ittri kienu jinkludu l-informazzjoni meħtieġa li l-pulizija Maltija kien jeħtieġ li tibgħat biex titkompla t-talba tagħhom.
Meta kien ġie mistoqsi dwar l-allegat ħlas minn Fenech lill-Partit Nazzjonalista biex ma jerġax jiġi elett bħala MPE fl-elezzjoni tal-2019, Casa qal li kien iħoss li l-partit ma kienx qed jagħtih l-appoġġ tiegħu bħala kandidat.
Rigard talba li saret lilu u lill-MPE Portugiża Ana Gomes mill-aħwa Degiorgio, Casa qal li din il-laqgħa kienet ġiet rifjutata minħabba li huwa u Gomes kienu taw il-parir lill-aħwa Degiorgio biex jgħaddu informazzjoni li seta’ kellhom lill-Pulizija.
Intant is-seduta li jmiss se tkun qed tiżvolġi fit-12 ta’ Awwissu li ġej, bil-Ministru għall-Finanzi Edward Scicluna mistenni jagħti x-xhieda tiegħu.
