Chelsea qablu ftehim rekord Brittaniku ta’ £105.6 miljuni (€120 miljun) għall-midfielder rebbieħ tat-Tazza tad-Dinja mal-Arġentina ta’ Benfica, Enzo Fernandez.
Il-kuntratt kien għadu mhux iffirmat iżda kienu qed jinġabru dokumenti biex il-ftehim isir qabel l-iskadenza tat-Tlieta fil-11.00 pm ħin Ingliż għall-clubs tal-Premier League.
Il-ftehim jissupera l-£100 miljun li Manchester City ħallsu għal Jack Grealish fl-2021.
Fernandez, li ngħaqad ma’ Benfica għal £10 miljun biss, irrappurtati f’Awwissu, ġie magħżul il-Player Żagħżugħ tat-tournament waqt it-trijonf tal-Arġentina fit-Tazza tad-Dinja fil-Qatar inqas minn xahrejn ilu.
Il-wasla taż-żagħżugħ ta’ 22 sena tieħu l-infieq ta’ Chelsea f’Jannar għal £288 miljun, skond il-websajt tat-trasferimenti Transfermarkt.
Dan wara nefqa ta’ £292 miljun fis-sajf – rekord għal club Brittaniku fis-suq tas-sajf.
Dan huwa s-sitt akkwist l-aktar għali ta’ kull żmien, u daqs il-€120 miljun li Barcelona ħallsu għall-attakkant ta’ Franza, Antoine Griezmann, fl-2019.
Fernandez, li ngħaqad ma’ Benfica mingħand il-club Arġentin ta’ River Plate, skorja erba’ goals f’29 dehra mat-team tal-Primeira Liga.
Huwa skorja darba waqt it-Tazza tad-Dinja, u skorja t-tieni goal tal-Arġentina fir-rebħa tagħhom ta’ 2-0 fil-fażi tal-gruppi kontra l-Messiku.
Chelsea ffirmaw lil Noni Madueke, Mykhailo Mudryk, David Datro Fofana, Andrey Santos, Benoit Badiashile u Malo Gusto b’kuntratti permanenti f’Jannar, filwaqt li ħadu wkoll lil Joao Felix b’self mingħand Atletico Madrid.
