Fost il-ħafna attivitajiet organizzati fi programm mimli daqs bajda fil-festa tal-Imnarja, ilbieraħ resqu għall-wirja numru ta’ baqar.
Għal din il-wirja kien hemm parteċipazzjoni mdaqqsa fejn saħansitra kien hemm raħħal Għawdxi li qasam il-fliegu biex jersaq b’żewġ baqriet ukoll.
Il-wirja kienet maqsuma f’ diversi kategoriji fosthom dawk tar-razza Jersey, Brown Swiss, Red Holstein u Black Holstein. Minn kull razza ġew magħżulin l-aqwa tliet baqriet u wara kompliet l-għażla bejn l-aqwa tnejn minn kull razza biex finalment il-baqra ta’ Christian Borg intagħżlet bħala l-baqra rebbieħa.
Fil-kummenti tiegħu dwar il-baqar Maltin, il-persuna inkarigata mill-ġurija li nġieb apposta mill-Ġermanja faħħar il-livell tal-baqar lokali u qal li din il-baqra rebbieħa għandha futur fir-razzett ta’ Borg u li baqar bħala fir-razzett jgħinu biex ir-raħħal iżid fil-produzzjoni tiegħu.