minn Cristian Muscat
Illum Floriana u Marsaxlokk ikunu mpenjati fit-tieni leg tal-ewwel round ta’ kwalifikazzjoni tal-UEFA Europa Conference League meta jiltaqgħu kontra Tre Penne u Partizan Tirana rispettivament, fejn għandhom ċans li jkomplu javvanzaw.
F’San Marino Stadium, Floriana jieħdu magħhom vantaġġ ta’ 3-1 wara li fl-ewwel leg, il-Greens ittrijonfaw wara li ġew maħsuda mal-ftuħ tat-tieni taqsima minn goal ta’ Tommaso Guidi li fetaħ l-iskor għal Tre Penne b’xutt fil-baxx li għeleb għal kollox lid-debuttant goalkeeper, Christoffer Mafoumbi.
Iżda t-team immexxi mill-coach Darren Abdilla, skorja tliet goals fi spazju ta’ tmien minuti minn Kyrian Nwoko, Dunstan Vella u Thiago Santos.
Ta’ min isemmi li din se tkun is-27 partita għal Abdilla fil-kompetizzjonijiet Ewropej biex se jaqbeż ir-rekord ta’ Mark Miller tal-aktar coach li mexxa partiti mat-timijiet Maltin … li huma Gzira United (19), Valletta (6) u Floriana (2, inkluża dik tal-lum).
Din kienet l-ewwel partita tiegħu mal-Greens hekk kif ħa post Mauro Camoranesi. Huwa kien kuntent b’dak kollu li ra mill-players tiegħu minkejja li bosta minnhom huma ġodda li għad iridu jidraw l-ambjent Malti.
Peró huma jridu jġibu rispett lill-avversarji minħabba li għandhom players li kapaċi jdawru r-riżultat favur tagħhom. U konxji mill-fatt li se jkunu qed jilagħbu barra minn darna, huwa jrid jinżel bi pjan biex jannulla lil dawn l-attakkanti.
Se tkun kruċjali min se jiskorjaw l-ewwel goal. Dan minħabba li jekk Floriana jirnexxielhom jagħmlu dan, ikollhom sieq waħda fit-tieni round ta’ kwalifikazzjoni minħabba li l-avversarji jkunu jridu jiskorjaw erba’ goals biex ikomplu javvanzaw.
Jekk min-naħa l-oħra jkunu Tre Penne li jiftħu l-iskor, dawn jidħlu fil-partita bil-konsegwenza li jkun test ta’ reżiljenza għall-players Furjaniżi.
Abdilla se jibbaża fuq players stabbiliti bħal Jake Grech, Kyrian Nwoko, Alejandro Garzia, Dunstan Vella u l-aħjar player tal-ewwel leg, Kemar Reid. Barra minn hekk, il-Brażiljan Thiago Santos, jidher li se jkun akkwist mill-aktar importanti fejn wera l-potenzjal tiegħu fl-ewwel partita tiegħu.
Spettaturi attenti għal din il-partita se jkunu l-Portugiżi ta’ Vitoria de Guimaraes li se jkunu l-avversarji li jmiss għal min jikkwalifika minn dan il-konfront.
Il-logħba se tintlagħab f’San Marino Stadium u tibda fid-8.45 pm.
MARSAXLOKK B’VANTAĠĠ
PSIKOLOĠIKU U MORALI
Marsaxlokk jibdew b’vantaġġ psikoloġiku u morali hekk kif fis-Centenary Stadium, fis-7.00 pm, jilqgħu lil Partizan Tirana, wara li fl-ewwel leg, fl-Elbasan Arena, f’Tirana, spiċċaw fi draw ta’ 1-1.
Bla dubju, dan huwa riżultat mill- aktar pożittiv għat-team immexxi mill-coach, Winston Muscat.
L-Albaniżi kellhom bidu ferm tajjeb hekk kif wara biss żewġ minuti fetħu l-iskor permezz ta’ Valentin Murataj. Iżda x-Xlukkajri kisbu d-draw wara kwarta logħob minn ġmiel ta’ goal ta’ Yuri Messias.
Il-partita kienet ferm pjaċevoli, tant, li r-riżultat seta’ mar kull naħa minħabba li ż-żewġ timijiet fallew bosta ċansijiet.
L-indikazzjonijiet wara dan il- konfront huma li x-Xlukkajri huma attrezzati tajjeb għal dan l-istaġun u teżisti possibbiltá kbira li jistgħu jispiċċaw mal-ewwel erbgħa.
Il-players debuttanti jidhru wkoll li se jkunu validi għall-objettivi tagħhom – Jefferson de Jesus Santos, Lucas Emmanuel Lopez Dessypris, Alex De Aguiar Gomes, Patrick Carvalho Nonato, Guttiner Heider Fernando Costa Tenorio u Igor Leandro Goularte Do Nascimento.
Huma għandhom il-potenzjal neċessarju u ma tkun l-ebda sorpriża li llum jiksbu l-kwalifikazzjoni għax huma armati tant tajjeb f’kull dipartiment.
Peró wieħed ma jridx inaqqas mill-mertu li Partizani huma avversarji mill-aktar diffiċli minħabba li huma organizzati tattikament u veloċi teknikament.
Iżda huma ġew ikkritikati bl-aħrax mill-media lokali wara li naqsu li jegħlbu lix-Xlukkajri.
Huma fallew milli jirbħu l-kampjonat domestiku bid-differenza tal-goals għas-spejjeż ta’ Egnatia li rebħu l-ewwel titlu tagħhom.
Huma għandhom żewġ players letali, Valentin Murataj u Tedi Cara, li jistgħu jkunu detrimentali għal Marsaxlokk.
Min-naħa tiegħu, Muscat sostna li l-players jinsabu ferm motivati għal dan il-konfront wara li fl-ewwel leg iltaqgħu ma’ xi diffikultajiet speċjalment il-loġistika tal-ground f’Tirana li nbidel fl-aħħar jiem.
Madankollu huma jinsabu għatxana għal rebħa biex eventwalment jiktbu l-istorja ta’ dan il-club.
Ir-rebbieħ ta’ din il-partita jilgħab kontra FC Iberia 1999 Tbilisi, fir-round li jmiss.
