Cristiano Ronaldo ingħaqad b’mod uffiċjali mal-club mill-Arabja Sawdija, Al Nassr għas-sentejn li ġejjin.
L-attakkant Portugiż kien player liberu wara li f’Novembru li għadda ntemmlu l-kuntratt ħesrem ma’ Manchester United wara intervista kontroversjali li fiha kkritika dak kollu li jmiss mal-club.
Il-kuntratt ta’ Ronaldo huwa wieħed rekord fl-istorja tal-football hekk kif se jaqla’ €185 miljun fis-sena.
Il-player ta’ 37 sena sostna li huwa “ħerqan li jesperjenza kampjonat ġdid f’pajjiż differenti.”
Huwa qal: “Jien fortunat li rbaħt kollox fil-football Ewropew u issa nħoss li dan huwa l-mument opportun biex naqsam l-esperjenza tiegħi fl-Asja.”
Al Nassr – disa’ darbiet champions tal-Pro League Sawdi – iddeskriva l-iffirmar bħala “li tintikeb l-istorja fil-proċess tagħha”.
Il-club qal li Ronaldo se “jispira l-kampjonat, in-nazzjon u l-ġenerazzjonijiet futuri, subien u bniet tagħna biex ikunu l-aħjar verżjoni tagħhom infushom”.
Fis-sajf, Ronaldo irrifjuta ftehim ta’ £305 miljun biex jingħaqad ma’ club ieħor tas-Sawdi – Al Hilal – għax kien kuntent mal-United.
Iżda f’Novembru, l-attakkant tkellem f’intervista ma’ Piers Morgan fejn qal li ħassu “tradut” mir-Red Devils, marlu kull rispett lejn il-coach Erik ten Hag u kien qed jiġi mġiegħel biex jitlaq mill-club.
Ronaldo, li skorja 145 goal f’346 dehra għall-United, ħalla lil Juventus biex reġa’ jingħaqad mal-club minn Old Trafford f’Awwissu 2021 – 11-il sena wara li telaq biex jingħaqad ma’ Real Madrid.
Huwa kien fadallu ftit aktar minn seba’ xhur fuq il-kuntratt tiegħu ta’ £500,000 fil-ġimgħa mal-United iżda t-tluq immedjat tiegħu kien “miftiehem b’mod reċiproku”.
Ġurnata wara li ħalla l-club, ġie sospiż għal żewġ logħbiet domestiċi liema kastig ingħata wara li f’April li għadda, fil-logħba bejn Everton u Manchester United, waqt li kien sejjer lejn id-dressing room, huwa ħataf telefon minn idejn partitarju żgħir tat-Toffees u sabtu mal-art.
Huwa se jservi s-sospensjnoi fuq livell domestiku ma’ kwalunkwe club ġdid – fl-Ingilterra jew f’pajjiż ieħor – għalkemm ma tapplikax fuq livell ta’ clubs kontinentali, bħaċ-Champions League.
Fit-Tazza tad-Dinja li għadda, huwa sar l-ewwel player li skorja f’ħames edizzjonijiet tat-Tazza tad-Dinja.
