Inizjattiva immexxija mill-Ewroparlamentari Malti Daniel Attard, u appoġġjata minn 42 MPEs, talbet lill-FIFA u lill-UEFA biex jieħdu azzjoni urġenti kontra l-Assoċjazzjoni tal-Futbol Iżraeljana li qed tikser b’mod kontinwu r-regolamenti tagħhom stess.
F’żewġ ittri indirizzati lill-President tal-FIFA Gianni Infantino u lill-President tal-UEFA Aleksander Čeferin, l-MPE jindikaw kif diversi klabbs Iżraeljani li jinsabu fiż-żoni okkupati illegalment fil-Palestina qed jipparteċipaw fil-kompetizzjonijiet domestiċi mingħajr il-kunsens tal-Assoċjazzjoni tal-Futbol Palestinjana (PFA). Dan jirrappreżenta ksur ċar u kontinwu tar-regolamenti tal-FIFA u tal-UEFA.
L-ittri jenfasizzaw ukoll ir-restrizzjonijiet sistematiċi fil-futbol Palestinjan inkluż restrizzjonijiet fil-moviment tal-plejers, attakki fuq istituzzjonijiet sportivi u ħsarat fuq faċilitajiet li kollha jxekklu d-dritt tal-plejers u l-partitarji Palestinjani li jipparteċipaw b’mod ugwali fil-futbol.
L MPEs qegħdin jitolbu lill-FIFA u lill-UEFA biex:
• Jissospendu lit-timijiet Iżraeljani minn kull kompetizzjoni internazzjonali sakemm terġa’ tinkiseb il-konformità mar-regolamenti u mal-liġi internazzjonali;
• Jinfurzaw ir-regolamenti tagħhom u jwaqqfu minnufih il-parteċipazzjoni tal-klabbs Iżraeljani li jinsabu fiż-żoni okkupati illegalment;
• Iżommu lill-Assoċjazzjoni tal-Futbol Iżraeljana responsabbli għall-ksur tar-regolamenti;
• Jiggarantixxu d-drittijiet sħaħ u ugwali tal-Assoċjazzjoni tal-Futbol Palestinjana.
“Meta r Russja invadiet lill-Ukrajna, il-FIFA u l-UEFA ħadu deċiżjoni fi ftit jiem. Il-kredibbiltà tiddependi fuq il-konsistenza, l-istess prinċipji jridu japplikaw illum,” saħaq Attard.