Qormi Hockey Club A baqgħu jżommu l-ewwel post tal-klassifika tal-kampjonat tal-Ewwel Diviżjoni tad-darts meta f’logħba missielta għelbu lil Floriana Ajax A 5-3.
Dan kien it-tieni konfront dirett li ffaċċjaw il-Qriema wara r-rebħa li kellhom kontra Ħamrun Education Men il-ġimgħa l-oħra. Floriana dejjem kienu minn fuq fl-ewwel parti tal-logħba iżda rimonta drammatika ta’ Qormi Hockey Club fl-aħħar mill-aħħar tahom ir-rebħa finali.
Sadanittant iż-żewġ timijiet mill-Ħamrun iġifieri Bayern u Education telgħu fit-tieni post tal-klassifika wara rebħiet identiċi ta’ 5-3 kontra Sliema Inter DC u Manchester Conquest.
Sadanittant PO’s Bar Gudja setgħu jiċċelebraw l-ewwel rebħa staġjonali wara skor ta’ 5-3 kontra Floriana Ajax A li min-naħa tagħhom għadhom mingħajr punti fil-klassifika.
Fil-kampjonat tat-tieni diviżjoni, Qormi Hockey Club B u Fgura Darts B baqgħu leaders assoluti fil-klassifika. It-tim minn Ħal Qormi rebaħ 5-3 lil Top Gun Bar filwaqt li Munchies Bar żammew fi draw ta’ 4-4 lill-istess tim mill-Fgura.
Whyte Hart kisbu t-tielet rebħa staġjonali wara suċċess ta’ 6-2 fuq Ħamrun Bayern B.
Mill-kampjonat tat-tielet diviżjoni, Beland’s Bull Eye baqgħu jżommu l-konsistenza tagħhom wara li għelbu lil St Paul’s Diamonds 6-2 filwaqt li Qormi Hornets telgħu waħedhom fit-tieni post tal-klassifika wara rebħa tajba ta’ 5-3 kontra Mqabba FC.
KLASSIFIKA – L-EWWEL DIVIŻJONI
Qormi Hockey A 13, Ħamrun Education, Ħamrun Bayern A 12, Floriana Ajax A, Manchester Conquest 9, PO’s Bar Darts Club 3, Sliema Inter DC 1, Floriana Ajax B 0
KLASSIFIKA – IT-TIENI DIVIŻJONI
Qormi Hockey B, Fgura Darts B 12, Ħamrun Bayern B, Buġibba Whyte Harte 9, Munchies Buġibba 6, Top Gun Bar, Żurrieq FC, B’Buġia St Peter BC 0
KLASSIFIKA – IT-TIELET DIVIŻJONI
Beland’s Bull Eye 13, Qormi Hornets 11, Banda B’Buġia 1990, St Paul’s Diamonds 10, Mqabba tal-Ġilju 3, Cox Sports Club 2, Mqabba FC Darts 1, Fgura Darts A, Education Bar Ladies 0
