Il-Ministru għall-Wirt Nazzjonali, l-Arti u l-Gvern Lokali Owen Bonnici qal li dan id-dibattitu reġa’ kixef id-differenza ideoloġika u ta’ viżjoni bejn iż-żewġ partiti. Qal li Gvern Laburista irid ikompli jbiddel l-affarijiet għall-aħjar u jġib aktar bidliet, drittijiet u riformi mentri l-Partit Nazzjonalista żgur mhux dak li ġenerazzjonijiet sħaħ iridu għar-riformi u bidliet li jkomplu jtejbu l-ħajja ta’ dak li jkun.
Huwa qal li: “se nkomplu nwessgħu l-opportunitajiet biex aktar nies isiru ġenituri. Se nippermettu lit-tobba u l-ispeċjalisti tagħna jagħmlu użu mix-xjenza biex nevitaw stejjer ta’ qsim il-qalb ta’ trabi li jitwieldu b’ċertezza li jmutu fi ftit ġimgħat.”
“Dan huwa dibattitu b’saħħtu għaliex b’liema mod jekk għandek ix-xjenza li tipprovdi soluzzjoni, li barra minn Malta tintuża diġà, xi ħadd jemmen li għandu d-dritt li jiddeċiedi hu fuq ħaddieħor f’xi ħaġa bħal din li hi ta’ ġid u favur il-ħajja? Dan il-Gvern huwa kommess li jkompli jmexxi din ir-riforma ‘l quddiem,” tenna l-Ministru Bonnici.
