Gzira United ….…1
Naxxar Lions ……1
Minn Cristian Muscat
Mill-Bottom Six, Gżira United u Naxxar Lions temmew il-konfront ta’ bejnitehom fi draw ta’ 1-1, bi Gzira jiddominaw għal kollox l-ewwel taqsima, iżda fit-tieni taqsima Naxxar wettqu reazzjoni mill-aqwa u ta’ dan ġew ippremjati hekk kif salvaw ir-riżultat.
Kollox ma’ kollox kienet logħba eċċitanti ta’ żewġ uċuh hekk kif it-timijiet kellhom il-mumenti pożittivi tagħhom f’ħinijiet differenti tal-partita.
Kienu l-Gżirjani li ħarġu fuq l-offensiva u fl-10 minuta Luis Carlos Riascos kellu d-daqqa ta’ ras minn taħt il-lasti tiġi salvata minn fuq il-linja mill-goalkeeper żagħżugħ, Matthias Debono.
Huma komplew jiddettaw il-loghob u fit-23 minuta, Thiago Espindola ttanta xortih permezz ta’ xutt mid-distanza li iżda sab lil Debono attent hekk kif salva b’diffikultá.
Aktar ma beda jgħaddi l-ħin, il-Maroons komplew jiddominaw u fil-31 minuta, Thaylor Aldama xeħet cross fil-baxx lejn Christian Saint Ebisindor li mill-viċin għamel l-impossibbli u tefa’ inkredibbilment għoli.
Fil-ftuħ tat-tieni taqsima, Gzira ħarġu ferm aggressivi u ta’ dan ġew ippremjati meta fil-51 minuta ngħataw penalty. Mill-11-il metru GABRIEL BOHRER MENTZ ma żbaljax hekk kif permezz ta’ xutt b’saħħtu spara l-ballun fis-saqaf tax-xibka.
Iżda kontra x-xejra tal-logħob, Naxxar ġabu l-iskor indaqs permezz ta’ xutt mid-distanza ta’ EDSON CERQUEIRA FARIAS li ma ta l-ebda ċans lill-goalkeeper ta’ Gzira United, Justin Haber. Interessanti huwa l-fatt li dan kien il-200 goal tal-istaġun.
Dan il-goal ipprovda injezzjoni morali lin-Naxxarin, fejn bdew jersqu iktar lejn il-lasti avversarji u fis-76 minuta, il-Ġappuniż Ito Yasukaze kellu f’saqajh il-goal tar-rebħa iżda kellu t-tentattiv tiegħu, permezz ta’ lob delizzjuż, jiġi salvat minn Justin Haber li kien barra minn postu iżda reġa’ lura u salva fil-ħin.
Fl-aħħar mumenti tal-partita, Gzira tefgħu kollox fuq l-attakk fit-tentattiv li jerġgħu jaqilbu l-iskor favur tagħhom iżda sabu lid-difiża Naxxarija ferm organizzata li annullat għal kollox l-attakki tagħhom.
L-iskor baqa’ ma nbidilx sat-tmiem, biż-żewġ timijiet jieħdu punt kull wieħed.
GZIRA U.: 16-Justin Haber, 3-Gabriel Bohrer Mentz, 5-Enrico Pepe, 7-Thaylor Aldama, 8-Zachary Scerri, 14-Luis Carlos Riascos, 18-Christian Saint Ebisindor, 20-Alex da Paixao Alves, 23-Farid Romero Zuniga, 47-Brookyln Borg, 93-Thiago Espindola – Coach: Giovanni Tedesco
NAXXAR L.: 1-Matthias Debono, 3-Nikolai Micallef, 8-Neil Pace Cocks, 10-Edson Farias Cerqueira, 13-Kayne Haber, 15-Ryan Gilmour Cassar, 19-Gustavo Babosa Santos, 23-Caxambu, 25-Fernando Barbosa Pereira, 31-Degran Jackson, 44-Ito Yasukaze – Coach: George Vella
REFEREE: Matthew Degabriele
ASS. REFEREES: Mitchell Scerri, David Castillo
RABA’ UFF: Alex Johnson
SKORERS: G. Bohrer Mentz 51 pen (GU); E. Farias 62 (NL)
AMMONITI: C. St Ebisindor, B. Borg, M. Dias (GU)