Fi tmiem il-ġimgħa li għadda, l-Amerikani kellhom l-opportunità li jiċċelebraw Halloween u jidher li ppreferew iduru fit-toroq iħabbtu fuq il-bibien u min jiftħilhom jgħidulu “trick-or-treat” jew imorru f’parties lebsin il-kostumi. Dan għax żewġ films tal-biża’ li ħarġu għall-wiri fit-teatri Amerikani, ma tantx kellhom ftuħ tajjeb. Qed nirreferi għal “Antlers” u “Last Night in Soho”. Ebda wieħed minhom ma daħal ma’ l-aħjar ħamsa ta’ tmiem il-ġimgħa.
Minflok films tal-orrur ġodda, l-udjenza Amerikana ippreferaw jaraw tnejn oħra li ilhom ftit magħna: “Halloween Kills” (li spiċċa fit-tieni post) u “Venom: Let There Be Carnage” (li okkupa l-ħames post).
Il-film li baqa’ jiddomina l-box office Amerikana għat-tieni ġimgħa konsekuttiva kien “Dune”. Il-ġimgħa l-oħra, għamilt il-mistoqsija jekk “Dune” huwiex ser ikollu t-tieni parti. Minħabba s-suċċess li qed jikseb fejn mill-pajjiżi kollha fejn ħareġ diġa kellu dħul ta’ $300 miljun, ġie kkonfermat li t-tieni parti ta’ “Dune” ser tinħadem u mistennija tkun fit-teatri fl-2023.
Fit-tielet post tal-box office Amerikana nsibu “No Time To Die”. Mill-pajjiżi kollha fejn ħareġ, id-dħul hu ta’ $600 miljun.
L-uniku film ġdid ma’ l-aqwa ħamsa fil-box office Amerikana kienb’sorpriża “My hero Academia: World Heroes’ Mission”.
Last Night In Soho
Maħdum taħt id-direzzjoni ta’ Edgar Wright, “Last Night in Soho” hu psychological thriller.
Eloise (Thomasin MacKenzie) tkun studenta li tixtieq karriera bħalha disinjatriċi tal-moda. Hi ukoll tfajla ossessjonata b’Londra tas-sittinijat. Hi tikri appartament mingħand Mrs Collins (Diana Rigg li ħallietna f’Settembru tas-sena l-oħra). Eloise għandha xi ħaġa partikolari: il-ħames sensi tagħha kapaċi jieħdu aktar tagħrif milli l-moħħ ikun kapaċi jipproċessa – dik li tissejjaħ ‘sensory overload’.
Il-viżjonijiet li jibda jkollha bil-lejl ikunu biss ħolm? Eloise issib ruħha fil-ħajja ta’ Sandie (Anya Taylor-Joy), li fis-snin 60 ikollha l-ambizzjoni li ssir kantanta, żeffiena u attriċi. Il-ħolm ta’ Sandie jidhru li jsiru realtà meta tiltaqa’ ma’ wieħed li jkun manager li jista’ jintroduċiha man-nies influwenti f’din l-industrija. U hekk Eloise tinġarr f’din l-avventura ta’ imħabba u ħolm, fejn mhux kull ma jleqq hu deheb. Eloise tadotta lil Sandie bħalha r-role model tagħha, anke meta l-affarijiet jieħdu xejra mhux mistennija.
Ma tistax tgħid li d-direttur Wright ma jissellifx xi ideat mill-films tal-orrur Ingliżi li kienu jinħadmu mill-kumpanija Hammer imma jadatta dawn l-ideat għax-xewqat tal-udjenza kontemporanja.
Gwida għal min ser jarah: ikklassifikat 18 (għandhom jarawh persuni li huma ’l fuq minn 18-il sena) minħabba xeni ta’ vjolenza qawwija u mdemmija.
Black and Blue
Dan hu action thriller fejn jitratta għal darba is-suġġett tal-korruzzjoni fost il-pulizija Amerikana.
Fuq dan is-suġġett rajna diversi films. Kellna bosta li kienu tajbin ħafna, fosthom il-klassiku “Serpico” u aktar riċenti “Training Day”. “Black and Blue” mhux fil-livell tagħhom imma l-interpritazzjoni tajba ta’ Naomie Harris fil-parti tal-pulizija, Alicia West issalva dan il-film. Alicia tkun serviet ukoll fl-armata Amerikana.
Id-direttur Deon Taylor mill-ewwel jistabilixxi li qalb il-pulizija ta’ New Orleans hemm element qawwi ta’ korruzzjoni u li ma tista’ tafda lil ħadd minn sħabha. Alicia tiddistingwi ruħha għal mod sod kif iżżomm il-valuri tagħha f’kull xena.
Il-qofol tal-istorja tibda meta darba minn jedda tidħol għal double shift ma’ pulizija ieħor li jismu Brown (James Moses Black). Huwa jieqaf ħdejn binja abbandunata. Jordnalha biex tibqa’ barra fil-karozza tas-servizz. Brown jidħol fil-binja u ftit wara Alicia tisma’ żewġ tiri. Alicia tidħol fil-binja, liebsa body camera u tara lid-detektiv Terry Malone (Frank Grillo), fil-kumpanija ta’ Brown u ta’ pulizija ieħor Smitty (Beau Knapp) qed joqtlu traffikant tad-droga kiesaħ u biered.
Meta jintebħu li Alicia West kienet qegħda tosservhom u tirrekordjhom, Smitty jisparalha. Alicia taqa’ u minkejja li tkun feruta jirnexxilha taħrab. Il-pulizija l-oħra, u magħhom jingħaqdu aktar pulizija jibdew tfittxija ntensiva għaliha. Dawn il-pulizija mhux jgħinuha jridu imma riedu l-body camera bil-filmat li tinkriminhom.
Donnu kulħadd hu kontriha, nkluż is-sieħeb tagħha fil-korp Kevin (Reid Scott). L-unika persuna li għall-ewwel b’mod ristrett ħafna, kien lest li jgħinha ikun Milo Jackson (Tyrese Gibson), wieħed li jaħdem fi store.
Is-sitwazzjoni taggrava aktar għal Alicia West meta d-detektiv qattiel u korrott Malone jimmanipula lill-baruni tad-droga Darius (Mike Colter), li kienet Alicia West li qatlet in-neputi ta’ Darius.
Il-camerawork tal-veteran Dante Spinotti hu effettiv. Spinotti kien ukoll responsabbli għall-iffilmjar ta’ films bħal “L.A. Confidential” “The Insider” u “Heat”. L-istil tiegħu mill-ewwel tgħarrfu.
Gwida għal min ser jarah: ikklassifikat 15 (għandhom jarawh persuni li huma ’l fuq minn 15-il sena) minħabba xeni ta’ vjolenza u l-lingwaġġ li jintuża.
