Id-Deputat Nazzjonalista Edwin Vassallo appella lill-Gvern biex jgħin iżomm iċ-ċanga ta’ Malta tinbiegħ bi prezz iżjed kompetittiv u ma titpoġġiex fi żvantaġġ maċ-ċanga importata.
Vassallo qal dan wara li saħaq li l-ispiża fil-biċċerija għall-preparazzjoni taċ-ċanga biss – li tinkludi tqattigħ, spulpjar u tindif mix-xaħam – żdied minn €20 sa €30 kull karkassa.
Vassallo tenna li dawn iż-żidiet qed jiġu riflessi f’żieda fil-prezz tal-laħam għall-konsumatur f’mument meqjus bħala ta’ periklu għas-saħħa tal-poplu minħabba l-biża’ li ġabet magħha l-pandemija tal-Covid-19.
Huwa saħaq li l-Partit Nazzjonalista jemmen li l-prezz għal kull prodott essenzjali li jinbiegħ għandu jkun prezz ġust.
