Roderick Monreal, raġel ta’ 32 sena, ġie kkundannat erba’ snin ħabs hekk kif ammetta li hu kien involut fil-ħruq ta’ vann li kien ipparkjat ħdejn il-Gozo Stadium. Ammetta wkoll li wettaq ħsara fuq propjetà tal-Assoċjazzjoni Għawdxija tal-Futbol (GFA).
Ir-raġel kien mixli mill-Ispettur Bernard Charles Spiteri li fl-1 ta’ Settembru ta’ sentejn ilu, waqt li kien qiegħed fil-parkeġġ li hemm ħdejn il-Gozo Stadium fix-Xewkija, ta n-nar lil vann kif ukoll wettaq ħsara fuq propjetà tal-GFA.
Kien fis-16 ta’ Settembru tal-2021 meta hu ammetta l-akkużi kollha kontrih u aktar tard dik is-sena stess kien informa lill-Qorti li kien ħallas is-somma ta’ €1,900 lill-GFA.
Il-Maġistrat Simone Grech fis-sentenza qalet li qieset ir-rapport li sar mill-uffiċjal tal-probation. Ikkunsidrat ukoll li Monreal kien wieħed minn ħames persuni li kienu tressqu l-Qorti b’rabta ma’ dan il-każ.
Il-Maġistrat Grech ikkundannat lill-akkużat erba’ snin ħabs u poġġietu taħt ordni ta’ trattament għal 3 snin. Hija ħarġet ukoll ordni ta’ trażżin biex tipproteġi lill-vittma ta’ dan il-każ.
