Il-manager ta’ Ajax, Erik ten Hag, huwa lest li jiffirma kuntratt ta’ erba’ snin biex jieħu f’idejh it-tmexxija ta’ Manchester United il-ġimgħa d-dieħla.
Minkejja rabtiet ma’ coaches bħal Luis Enrique, Mauricio Pochettino u Julen Lopetegui, ir-Red Devils huwa mifhum li għażlu lil Ten Hag bħala s-suċċessur permanenti ta’ Ole Gunnar Solskjaer.
Il-coach ta’ 52 sena ddejjaq jiddiskuti r-rwol filwaqt li jibqa’ fit-tmexxija ta’ Ajax.
Ten Hag mistenni jiffirma kuntratt ma’ Manchester United sal-2026 u huwa mifhum li diġà beda x-xogħol biex jintgħażel l-istaff tekniku tiegħu.
Jidher li l-assistent ta’ Ajax Mitchell van der Gaag se jsegwi lil Ten Hag f’Old Trafford, iżda Robin van Persie x’aktarx ma jingħaqadx mal-kompatrijott tiegħu minħabba l-impenji tal-familja f’art twelidu, l-Olanda.
Qabel il-wasla antiċipata ta’ Ten Hag, jidher li players ta’ Manchester United diġá qed jistaqsu lill-ex player ta’ Ajax Donny van de Beek dwar il-metodi ta’ taħriġ tal-manager.
