Jaroslav Silhavy telaq mill-kariga ta’ coach ewlieni tar-Repubblika Ċeka wara li wassal lit-team għall-finali tal-Euro 2024, li se jsiru f’Ġunju u f’Lulju li ġejjin fil-Ġermanja.
Silhavy, ta’ 62, ħa t-tmexxija f’Settembru 2018 u mexxa lir-Repubblika Ċeka għall-kwarti-finali tal-Euro 2020. Iċ-Ċeki bbukkjaw posthom fil-Kampjonat Ewropew tas-sajf li ġej billi għelbu lill-Moldova 3-0 nhar it-Tnejn.
“Anke jekk aħna kuntenti issa, konna diġà ddeċidejna qabel il-logħba li ma nkomplux fil-kariga,” qal Silhavy. “Infurmajt lill-president tal-Assoċjazzjoni tal-Football tar-Repubblika Ċeka, Petr Fouska, dwar dan.
“Il-pressjoni kienet diġà enormi – kultant lanqas biss fhimtha. Dan ikkontribwixxa wkoll għad-deċiżjoni tagħna.”
Silhavy issorvelja 26 rebħa matul il-kariga tiegħu ta’ 56 logħba fit-tmexxija, waqt li kien hemm 10 draws u 20 telfa, u ggwidahom għat-tieni post fi Grupp E matul il-kampanja tagħhom ta’ kwalifikazzjoni għall-Euro 2024.
Iċ-Ċek kellu perjodi ta’ tmexxija domestika ma’ għadd ta’ clubs fosthom Viktoria Plzen u Slavia Prague.
“Mhux dwari biss, iżda għandi t-team ta’ implimentazzjoni kollu warajja. Jien konvint li għamilna xogħol tajjeb u qed inħallu warajna riżultati tajbin,” qal Silhavy.
Erbgħa u għoxrin siegħa biss qabel il-logħba kruċjali ta’ Grupp E tat-Tnejn, Silvhavy bagħat tliet players, inkluż Vladimir Coufal ta’ West Ham, id-dar wara li s-Sibt marru f’nightclub, li huwa kontra r-regoli tat-team nazzjonali.
