Fit-tielet programm tal-Ħames Ġurnata tar-round ta’ kwalifikazzjoni tal-Euro 2024, l-Ingilterra ġew miżmuma mill-Ukrajna bl-iskor ta’ 1-1 biex waqqgħu l-ewwel żewġ punti minkejja li għadhom fil-quċċata.
Grupp C – L-Ukreni ospitaw lill-Ingilterra liema partita ntlagħbet fil-ground newtrali ta’ Tarczynski Arena, f’Wroclaw, il-Polonja, minħabba l-gwerra li għaddejja f’pajjiżhom wara l-invażjoni tar-Russja.
Fil-veritá, l-Ingliżi ddiżappuntaw meta kienu ferm ‘il bogħod mill-forma solita tagħhom bil-konsegwenza li ftit li xejn fetħu pressjoni fuq il-lasti avversarji.
Kienu l-Ukreni li fetħu l-iskor, fis-26 minuta, meta Yukhym Konoplia xeħet lejn Oleksandr Zinchenko li kien fuq il-ġirja u bil-kalma kollha xeħet il-ballun fix-xibka.
Iżda erba’ minuti minn tmiem l-ewwel taqsima, l-Ingliżi kisbu d-draw meta Harry Kane xeħet cross bid-dawra lejn Kyle Walker li kkontrolla l-ballun qabel ma għeleb lill-goalkeeper, Georgiy Bushchan … biex dan kien l-ewwel goal tiegħu mat-team nazzjonali Ingliż.
Grupp F – Il-Belġju telgħu fl-ewwel post tal-klassifika b’differenza ta’ goals aħjar mill-Awstrija meta, barra minn darhom, għelbu lill-Azerbaijan bl-iskor ta’ 1-0 bil-goal importanti jasal minn Yannick Carrasco (38).
L-Isvezja marru l-Estonja u kisbu rebħa kbira bl-iskor ta’ 5-0, bl-iskorers ikunu Viktor Gyokeres (18), Dejan Kulusevski (24), Alexander Isak (39), Robin Quaison (75) u Viktor Claesson (91).
Grupp I – Andorra laqgħu lil Belarus u f’partita bilanċjata temmew fi draw ta’ mingħajr goals.
