Olanda ……..0
Franza ………0
F’partita bilanċjata li iżda ma laħqitx l-aspettattivi mixtieqa, l-Olanda u Franza temmew fi draw ta’ 0-0 biex issa jkollhom jistennew sal- partita li jmiss fit-tentattiv biex jgħaddu mal-Aħħar 16 tal-Euro 2024.
Mal-bidu tal-partita iż-żewġ timijiet ħarġu jfittxu l-goal biex titneħħa l-pressjoni minn fuqhom konxji mill-fatt li rebħa kienet tfisser li jkomplu javvanzaw f’dan it-tournament.
Iżda wara bidu qawwi, iż-żewġ settijiet ta’ players bdew jannullaw lil xulxin hekk kif id-difiżi rispettivi bdew jantiċipaw lill-attakkanti avversarji.
Fit-tieni taqsima, il-partita tilfet mir-ritmu, bil-logħob ikun konċentrat l-aktar f’nofs il-ground li prattikament żvolġa f’wieħed monotonu … bl-attakki jkunu skarsi.
Appena għaddew 55 sekondi, l-Olanda resqu ferm viċin li jiftħu l-iskor meta Jeremie Frimpong qata’ għal kollox lid-difiża Franċiża … avvanza … u bl-għajta tal-goal, minn pożizzjoni angolata ra lill-goalkeeper Mike Maignan imiss il-ballun u jixħet għal corner.
Ir-reazzjoni tal-Franċiżi kienet immedjata meta Antoine Griezmann fajjar xutt minn barra l-kaxxa li ġiegħel lill-goalkeeper, Bart Verbruggen, iwettaq save kbir billi dawwar f’corner.
Fit-tmien minuta, l-Olanda appellaw għal penalty meta William Saliba għamel kuntatt minimu ma’ Memphis Depay iżda kien kollox normali għar-referee Ingliż, Anthony Taylor.
Fl-14-il minuta, Griezman naqas milli jikkonkludi meta Adrien Rabiot ippreżentalu l-ballun fuq platt tal-fidda u waħdu b’lasti vojta laqat ħażin il- ballun. Minuta wara, Jules Kounde żmarka lill-istess Griezmann li b’xutt imdawwar ra t-tentattiv tiegħu jgħaddi jħakkek mal-lasta.
Tliet minuti wara, kien l-Olandiż, Cody Gakpo, li minn tarf il-kaxxa sab lil Maignan attent billi dawwar f’corner.
Fit-33 minuta, Frimpong seraq il-ballun lil Griezmann f’nofs il-ground, avvanza u meta daħal fil-kaxxa ġie nnewtralizzat fil-ħin minn Saliba.
L-ewwel azzjoni denja ta’ nota fit-tieni taqsima waslet fis-60 minuta meta Rabiot għadda lejn Marcus Thuram f’tarf il-kaxxa bil-konklużjoni tiegħu tgħaddi tħakkek mal-lasta.
U proprju żewġ minuti wara Tchouameni ra d-daqqa ta’ ras tiegħu tgħaddi minn fuq il-mimduda.
Fis-66 minuta, Franza fallew opportunitá kbira meta N’Golo Kante żmarka lil Griezmann iżda reġa’ falla minn tliet metri bogħod.
Għal dan in-nuqqas, kienu l-Olanda li skorjaw iżda l-goal ta’ Xavi Simons ġie mħassar għal offside ta’ Denzel Dumfries li kien qed jinterferixxi fil-logħob.
Lejn it-tmiem Franza ppressaw għal goal tar-rebħa iżda l-iskor baqa’ dak ta’ mingħajr goals.
