F’konferenza stampa li ndirizza il-coach tat-team nazzjonali Taljan, Roberto Mancini, huwa beda biex qal li għandu rispett massimu lejn il-Maltin bħala l-avversarji tagħhom.
Huwa tenna li segwa l-partita kontra l-Maċedonja u minkejja li l-Maltin sfaw megħluba bl-iskor ta’ 2-1, huwa kellu kliem ta’ tifħir għat-team Malti, u mingħajr ma semma ismijiet partikolari sostna li laqtuh diversi players.
Huwa tenna wkoll li l-Maltin kienu kompatti u wrew dixxiplina fil-prestazzjoni tagħhom speċjalment fid-difiża fejn l-avversarji sabuha diffiċli biex jippenetraw.
Mistoqsi minn dan il-ġurnal jekk iħossx xi tip ta’ pressjoni wara li se jkunu għadhom kif ġejjin minn telfa ta’ 2-1 kontra l-Ingilterra huwa wieġeb fin-negattiv.
Huma jridu jinsew it-telfa ta’ nhar il-Ħamis li għadda u jikkonċentraw fuq il-konfront tal-lum
Dan is-sit staqsa wkoll lill-coach nazzjonali Taljan jekk din il-partita hux se tkun qed iġġedded xi memorji jew xi forma ta’ nostalġija meta fil-passat huwa stess affronta lil Malta bħala player.
Huwa wieġeb li għandu memorji ferm sbieħ ta’ pajjiżna għalkemm issa għadda ż-żmien.
Intant, huwa qal ukoll li se jkun hemm xi bidliet mill-aħħar partita.
