Portugall ………..2
Malta …………….1
Malta sellmet lill-Kampjonat Ewropew ta’ Taħt id-19-il sena, li qed isir f’pajjiżna, b’telfa ta’ 2-1 kontra l-Portguall.
Din kienet l-aħħar partita tat-team Malti f’dan it-tournament hekk kif safa eliminat qabel dan il-konfront wara li sofra żewġ telfiet.
Iżda l-punt pożittiv kien li sa fl-aħħar irnexxielna nsibu x-xibka avversarja.
Mingħajr tlaqliq, il-Portugiżi kienu teknikament aħjar u territorjalment superjuri.
Wara goal kmieni, huma lagħbu bi trankwillitá kbira u l-interchanging tagħhom tant kien perfett, li bdew isibu lil xulxin b’intuwizzjoni naturali … bil-Maltin bdew jiġru ħafna u jaħlu tant enerġija.
Kien lejn l-aħħar kwarta tal-ewwel taqsima, li l-Maltin bdew jippressaw iżda ma nkwadrawx il-lasti biex il- goalkeeper avversarju qatt ma ġie mpenjat.
Kulħadd huwa konxju mill-iskola tal-football Portugiża li hija minn fost l-aqwa fl-Ewropa.
U minkejja li l-coach għażel li jagħmel rotazzjoni ta’ players wara li assiguraw posthom fis-semi-finali, huma xorta kienu l-aħjar team.
Il-limitazzjonijiet tagħna fil-football huma reali iżda fl-istess waqt irridu nammiraw id-determinazzjoni tal-players tagħna.
Fit-tieni taqsima, il-Maltin tjiebu u l-goal li skorjajna kien injezzjoni psikoloġika … li b’kuntrast għall-avversarji dehru mifxula, bil-coach tagħhom deher irrabjat u diżappuntat … anke jekk kisbu t-tliet punti.
Peró, jekk wieħed janalizza l-wirjiet tal-Maltin kien hemm sitt players li spikkaw. Dawn kienu l-aħwa Lucas u Dylan Scicluna, Andrew Borg, Benjamin Hili, Jake Micallef u Basil Tuma.
Il-livell ta’ dawn il-players huwa wieħed għoli u jekk iżommu saqajhom mal-art, għandhom futur kbir quddiemhom.
Mal-ewwel attakk denju, fit-tmien minuta, il-Portugiżi fetħu l-iskor meta Joao Goncalves xeħet lejn Miguel Fale li għadda bejn Matthias Ellul u Daniel Letherby u b’xutt fil-baxx minn tarf il-kaxxa xeħet il-ballun fir-rokna tax- xibka, bil-goalkeeper Malti, Hugo Sacco, megħlub għal kollox.
Fit-28 minuta, Lucas Scicluna xeħet back pass erratiku biex il-goalkeeper Malti kellu jixħet f’corner li fortunatament l-istess Sacco rrimedja minn cross perikoluż ta’ Joao Goncalves. Tliet minuti wara, Sacco salva lill-Maltin meta dawwar għal corner it-tentattiv ta’ Luis Gomes minn taħt il-lasti.
It-tieni taqsima fetħet b’xutt ta’ Jorge Meireles mid-distanza li l-goalkeeper Sacco laqa’ bi tbatija.
Madankollu, kontra x-xejra tal-logħob, fit-72 minuta, il-Maltin kisbu d-draw meta Tristan Viviani kklerja fit-tul bil-ballun jasal fi tliet kwarti ta’ ground fejn Basil Tuma approfitta mill-ħarġa ħażina tal-goalkeeper Portugiż u minn tarf il-kaxxa xeħet f’xibka votja.
Iżda dan il-goal dam jitgawda tliet minuti biss hekk kif il-Portugall reġgħu marru fil-vantaġġ meta mill-cross ta’ Miguel Fale, Joao Goncalves kompla l-ballun għal ġewwa.
PORTUGALL: 12-Diogo Pinto, 2-Goncalo Esteves, 4-Gabriel Bras, 10-Diogo Prioste (20-Hugo Felix 45), 11-Jorge Meireles (9-Rodrigo Ribeiro 65), 13-Martim Fernandes (7-Carlos Borges 65), 14-Jose Gomes, 15-Herculano Nabian (5-Martim Marques 65), 16-Yanis Da Rocha, 17-Joao Goncalves, 19-Miguel Fale – Coach: Joaquim Milheiro
MALTA: 1-Hugo Sacco, 2-Andrew Borg (13-Bjorn Buhagiar 68), 3-Matthias Ellul, 4-Sven Xerri, 6-Jake Micallef, 7-Nathan Cross (19-Sean Gatt 68), 8-Lucas Scicluna, 9-Basil Tuma, 11-Benjamin Hili (15-Tristan Viviani 53), 16-Lucas Caruana (20-Brooklyn Borg 68), 17-Daniel Letherby (14-Ivin Farrugia 79) – Coach: Antonio Mendes
REFEREE: Joonas Jaanovits (Estonja)
ASS. REFEREES: Aron Harsing (Estonja); Yossi Babayoff (Iżrael)
RABA’ UFF:Yigal Frid (Iżrael)
SKORERS: M. Fale 8, J. Goncalves 75 (P); B. Tuma 72 (M)
AMMONITI: L. Caruana, D. Letherby, M. Ellul (M)
