Sta Lucia …….2
Valletta ……….1
Goal kmieni tal-ex-player ta’ Valletta, Nicholas Pulis, witta t-triq għal Santa Lucia biex dawn irritornaw għar-rebħ meta għelbu lill- Beltin bl-iskor ta’ 2-1.
Filwaqt li din ir-rebħa tagħti kuraġġ lil Sta Lucia li jinsabu fil-post ta’ qabel l-aħħar, b’din it-telfa issa Valletta qed jirriskjaw li ma jispiċċaw mal-ewwel sitta hekk kif jinsabu fit-tmien post ma’ Mosta b’21 punt.
Wara t-telfa kontra Hibernians, Valletta laqgħu lura lil Ryan Camilleri u Eslit Sala waqt li Andrea Zammit u Kevin Tulimieri bdew fil-formazzjoni inizjali. Min-naħa l-oħra, Santa Lucia, bdew bl-istess ħdax wara d-draw ma’ Sliema Wanderers.
Il-Luċjani kellhom bidu mill-aqwa meta fetħu l-iskor wara biss erba’ minuti b’goal mill-isbaħ ta’ NICHOLAS PULIS li venven xutt minn tliet kwarti ta’ ground li għeleb għal kollox lil Guarnone bil-ballun jispiċċa fir-rokna ta’ fuq.
Valletta rrispondew fis-17-il minuta b’xutt ta’ Andrea Zammit li ġie mblukkat f’corner minn difensur. Ħames minuti wara, Enmy Pena Beltre għadda lejn Kevin Tulimieri li ttanta xortih b’ xutt minn barra l-kaxxa li Haber salva parzjalment.
Fit-32 minuta, Fontanella rċieva cross mil-lemin f’pożizzjoni ideali quddiem Haber iżda l-goalkeeper ta’ Santa Lucia salva tajjeb.
Tmien minuti mill-ftuħ tat-tieni taqsima, Sta Lucia heddew b’xutt angolat ta’ Dexter Xuereb li ġie mdawwar f’corner u l-istess corner ta’ Silva Mota ġie mblukkat minn Guarnone bil-ballun jasal għand Prestes Filho li kellu t-tentattiv tiegħu salvat tajjeb mill-goalkeeper Belti.
Fit-62 minuta, Santa Lucia rduppjaw meta Prestes Filho għadda l-ballun lil Pisani fuq ix-xellug b’dan tal-aħħar jgħaddi ballun fil-baxx lejn VITO PLUT li dar ma’ żewġ difensuri qabel spara fix-xibka. Fil-71 minuta, Valletta reġgħu daħlu fil-logħba meta minn cross ta’ Fontanella, b’mod akrobatiku ESLIT SALA rnexxielu jegħleb lil Haber mill-viċin.
Fis-77 minuta, Curjuric resaq viċin għal Valletta b’konklużjoni mil-lemin li laqtet ix-xibka minn barra.
Santa Lucia rrispondew fit-82 minuta b’daqqa ta’ ras angolata ta’ Conti mix-xellug li ġiet salvata minn Haber u finalment, tliet minuti wara, il-Beltin reġgħu marru viċin li jsalvaw ir-riżulta b’daqqa ta’ ras ta’ Borg minn corner ta’ Curjuric.
STA LUCIA: 16-Justin Haber, 4-Andre Prates, 5-Jurgen Pisani, 6-Nicholas Pulis, 7-Gianmarco Conti, 8-Patrick Silva Mota, 9-Vito Plut (10-Alan da Silva Souza 77), 11-Meghon Davidy Ayrton Valpoort (14-Jan Tanti 77), 17-Victor Luis Prestes Filho, 23-Dexter Xuereb, 29-Lorenzo Yoel Soares Fonseca – Coach: Giovanni Tedesco
VALLETTA: 26-Alessandro Guarnone, 4-Jean Borg, 5-Ryan Camilleri, 8-Luis Carlos Murillo (9-Haris Dilaver 58), 14-Christian Gauci, 17-Andrea Zammit (11-Michele Sansone 85), 18-Enmy Pena Beltre, 20-Ivan Curjuric, 66-Eslit Sala, 89-Mario Fontanella, 92-Kevin Tulimieri (97-Lucas Campos 58) – Coach: Danilo Doncic
REFEREE: Malcolm Spiteri
ASS. REFEREES: Alan Camilleri, Duncan Spencer
RABA’ UFF: Glen Tonna
SKORERS: N. Pulis 4, V. Plut 62 (SL); E. Sala 71 (V)
AMMONITI: K. Tulimieri (V); J. Haber, P. Silva Mota (SL)
