FA Trophy: Il-holders Sliema W. f’partita diffiċli kontra Hamrun S.

Minn Cristian Muscat

Bejn illum u għada jintlagħbu l-kwarti-finali tal-FA Trophy li b’kollox se jkun hemm seba’ timijiet mill-Malta Premier u ieħor miċ-Challenge League. 

Il-holders, Sliema Wan­derers, għandhom ostaklu diffiċli meta jiltaqgħu kontra Hamrun Spartans filwaqt li Birkirkara jaffrontaw lil Valletta biex terġa’ tiġġedded ir-rivalitá bejn dawn iż-żewġ timijiet. 

Floriana għandhom partita delikata kontra Mosta filwaqt li Hibernians jibdew favoriti li javvanzaw għas-semi-finali meta jiffaċċjaw lil Naxxar Lions. 

Hamrun S. v Sliema W. – Dan il-konfront huwa opportunitá għal Sliema Wanderers biex jirkupraw mill-forma negattiva li bħa­l­­issa għaddejjin minnha fil-kampjonat hekk kif tilfu l-aħħar tliet partiti. 

Iżda jridu jkunu fl-aqwa tagħhom kontra team li qed jimmira biex jirbaħ id-double. Peró, anke Hamrun Spartans ġejjin minn telfa fil-kampjonat meta sfaw megħluba minn Gzira Uni­ted bl-iskor ta’ 1-0. 

Għas-Slimiżi, li huma l-aktar team li rebaħ l-FA Trophy b’total ta’ 22 darba, din se tkun it-72 darba li se jilagħbu fil-kwarti-finali filwaqt li għall-Ħamruniżi se tkun il-61 darba. 

Din hija l-11-il kwarti-finali bejn dawn iż-żewġ ti­mijiet fejn fl-għa­xar konfronti preċedenti, il-Wanderers rebħu tmienja filwaqt li l-Ispartans rebħu l-aħħar tnejn. 

Peró, f’din il-­kom­petiz­zjoni dawn iż-żewġ timijiet iltaqgħu 16-il darba, bil-bilanċ ixaqleb lejn il-Wanderers fejn kisbu 11-il rebħa filwaqt li Hamrun rebħu l-ħamsa l-oħra. 

Biex waslu sa dan l-istadju, Sliema għelbu lil Għajnsielem (8-0) u lil Marsa (4-0) filwaqt li Hamrun għelbu lil Swieqi United (5-0) u lil Zabbar St Patrick (2-1). 

Floriana v Mosta – Din il-logħba se tkun ir-ripetiz­zjoni ta’ dik li ntlagħbet fi tmiem il-ġimgħa li għadda meta spiċċaw fi draw ta’ 2-2 liema partita kienet valida mill-kampjo­nat.  

Madankollu din hija logħ­ba differenti u għaldaqstant ħadd minnhom ma jaffordja jitlef minħabba li jiġi elimi­nat.

Din hija t-tieni kwarti-finali bejn dawn iż-żewġ ti­mijiet. L-oħra kienet intlagħbet fit-23 ta’ Mejju, 1976, bil-Furjaniżi joħorġu rebbieħa bl-iskor ta’ 1-0.

Iżda din il-partita ġiet nulla wara li l-Greens utilizzaw player ineliġibbli – Bertu Gatt li ffirmaw mingħand l-istess Mosta. 

Għalhekk l-MFA ordnat li terġa’ tintlagħab u saret ħamest ijiem wara bil-Furjaniżi joħorġu rebbieħa bl-iskor ta’ 6-0. 

Biex avvanzaw sa dan l-istadju, Floriana eliminaw liż-żewġ timijiet Għawd­xin ta’ Xewkija Tigers (2-0) u Victoria Hotspurs (4-1). 

Min-naħa tagħhom Mosta rebħu lil Marsaxlokk (3-0) u lil Qrendi (4-0). 

Birkirkara v Valletta – Dan huwa konfront bejn team mill-Malta Premier, Birkirkara, u dak miċ-Challenge League, Valletta. 

Iżda, bla dubju, dawn tal-aħħar ma għandhom bżonn tal-ebda introduzzjoni min­ħabba li huma wieħed mill- aktar clubs glorjużi fl-istorja tal-football Malti. 

Biżżejjed wieħed jgħid li l-Lilywhites rebħu din il-kompetizzjoni għal 14-il darba. 

Barra minn hekk, fi tmiem il-ġimgħa li għadda huma ġew promoss għall-ogħla di­viżjoni wara nuqqas ta’ staġun wieħed biss. 

Din se tkun il-ħames kwarti-finali bejn dawn iż-żewġ timijiet wara li fil-passat rebħu tnejn kull wieħed.

Fl-istorja ta’ din il-kompetizzjoni, iż-żewġ timijiet iltaqgħu 18-il darba, bil-Beltin jirbħu 10 filwaqt li l-Karkariżi jirbħu sebgħa bl-oħra tispiċċa fi draw. 

Rebħa minnhom għall- Karkariżi, fl-istaġun 1989-90, kienet walk-over wara li Valletta ġew skwalifikati.  

Biex waslu sa dan l-istadju, Birkirkara eliminaw lil Balzan (2-1) u lil Fgura Uni­ted (3-0) filwaqt li Valletta ssuperaw lil Nadur Youngsters (3-1), SK Victoria Wanderers (4-0) u lil Gzira Uni­ted (1-0) … b’James Scicluna jkun l-uniku player li s’issa skorja f’kull partita.  

Hibernians v Naxxar L. – Fuq il-karta Hibernians jibdew favoriti kontra Naxxar Lions iżda l-Pawlisti jridu juru rispett massimu lejn in-Nax­xarin. 

Din se tkun it-tielet kwarti-finali diretta bejn iż-żewġ timijiet wara li fil-passat reb­ħu waħda kull wieħed.

L-ewwel waħda tmur lura għad-29 ta’ Novembru, 1946, bin-Naxxarin joħorġu rebbieħa bl-iskor kbir ta’ 5-0. 

Il-Pawlisti rebħu dik tas-16 ta’ Mejju, 1999, bl-iskor ta’ 3-2.

Biex waslu sa hawn, Hibernians għelbu lil Zebbug Rangers u lil Qala Saints bl-iskor identiku ta’ 3-0. 

Min-naħa tagħhom Nax­xar eliminaw lil Melita (4-2) u lil Zurrieq (4-0).