Fabio Spiteri rebaħ l-isfida ta’ disat ijiem ‘DECA Taiwan’ b’risq ‘Project 100’, fejn temm din it-tiġrija iebsa ħafna bħala inizjattiva biex jinġabru fondi għal xelters tal-annimali. Fuq il-midja soċjali, Spiteri ħabbar: “Jien iċ-champion tad-DECA Taiwan! Ħolma li saret realtà! Din kienet għal Malta.”
Hu esprima s-sodisfazzjon tiegħu talli rnexxielu jlesti l-għawma ta’ 38km fi 13-il siegħa, iċ-ċikliżmu ta’ 1800km f’110 sigħat, u l-ġirja ta’ 422km f’105 sigħat. Hu spiċċa fl-ewwel post b’mod ġenerali, stabbilixxa rekord ġdid għall-korsa fit-Tajwan kif ukoll rekord nazzjonali, u temm it-tiġrija f’229 siegħa u 38 minuta.
Qabel it-tiġrija, Fabio kien staqsa lis-segwaċi tiegħu jekk kinux lesti li “jagħtu donazzjoni ta’ €50 lil Project 100” f’każ li jirbaħ it-tiġrija. Hu ssaporta disa’ ijiem ta’ attività fiżika intensa b’sitt sigħat ta’ rqad biss kuljum, u spiċċa bħala ċ-champion ta’ din il-kompetizzjoni eżawrjenti.




