Il-Malta Premier League u l-klabbs membri tagħha jifirħu lill-Hamrun Spartans FC li saru l-ewwel klabb Malti li kkwalifikaw għal league phase ta’ kompetizzjoni Ewropea.
“Il-parteċipazzjoni ta’ Hamrun għal UEFA Conference League hija game changer mhux biss għal dan il-club iżda għall-football Malti in ġenerali,” qal ic-Chairman tal-MPL, Joseph Muscat.
Dr Muscat sostna li minbarra s-suċċess sportiv, dan ir-riżultat se jsaħħaħ il-qagħda finanzjarja mhux biss ta’ Hamrun Spartans, iżda tal-clubs kollha tal-YoHealth Malta Premier.
B’dan ir-riżultat, Hamrun se jirċievu somma bla preċedent mill-UEFA, iżda wkoll il-koeffiċjenti tal-clubs Maltin se jiżdied b’mod li anki l-fondi li jitqassmu lill-11 – il club l-ieħor tal-ogħla diviżjoni tal-football Malti se tiżdied.
“Meta l-MPL giet iffurmata, waħda mill-għanijiet dikjarati kienet li mill-inqas club wieħed jgħaddi għal kompetizzjonijiet Ewropej. Minkejja x-xettiċiżmu, dan il-għan issa intlaħaq. Dan se jġib miegħu sfidi ġodda, fosthom ta’ ipprogrammar tal-kampjonat Malti, iżda fiduċjużi li dan huwa biss il-bidu ta’ fażi ġdida għal football Malti fejn clubs oħra jistgħu jiksbu l-istess suċċess,” temm jgħid Dr Muscat.