Waqt iż-żjara tiegħu fil-Kanada, il-Papa Franġisku talab maħfra lill-indiġeni tal-iskejjel residenzjali. “Jiddispjaċini ħafna,” qal il-Papa meta żar l-eks skola residenzjali f’Maskwacis, qrib Edmonton.
Huwa qal li l-apoloġija tiegħu hi biss l-ewwel pass u li trid issir “investigazzjoni serja” fuq l-abbużi biex tkun tista’ tfiq din il-ferita. L-iskejjel iffinanzjati mill-Gvern kienu parti minn politika maħsuba biex teqred kulturi u lingwi indiġeni.
L-apoloġija ntlaqgħet b’ċapċip minn dawn preżenti, b’uħud minnhom vjaġġaw distanzi twal biex ikunu jistgħu jisimgħu l-Papa jitkellem.
Wieħed mill-vittmi qal li ħassu emozzjonat ħafna jisma’ l-apoloġija tal-Papa, iżda ħafna huma dawk li għadhom ifittxu li tittieħed azzjoni. “Naħseb li probabbilment hemm ħafna vittmi oħrajn li għadhom pjuttost irrabjati,” huwa żied jgħid.
