Minn Cristian Muscat
Andrew, ħa mmur mal-ewwel għall-punt. Kif nibtet l-idea li bħala Exiles SC tinvolvu ruħkom fil-Pixxina l-ġdida li l-Mediterranean College of Sports (MCS) bniet ġewwa San Alwiġi, f’Birkirkara?
Kif taf, Cristian, l-Exiles, m’għandniex faċilitá adekwata għat-taħriġ tal-għawm u l-waterpolo fil- klabb tagħna ġewwa Tas-Sliema għaliex nittrenjaw fil-baħar miftuħ u għalhekk dan jista’ jsir biss fis-sajf meta l-elementi jkunu favur tagħna, jiġifieri baħar kalm u mingħajr bram. Għalhekk dejjem kienet il-ħolma tagħna li nsibu jew niżvilippaw pixxina adekwata għat-taħriġ u l-logħob anke jekk din tkun lil hinn mill-klabb tagħna. Xi snin ilu konna tkellimna ma’ San Alwiġi fuq dan il-ħsieb u meta eventwalment waslu fi ftehim mal-MCS għall-faċilitajiet sportivi dħalna f’kuntatt ma’ Vassallo Group biex nieħdu l-operat tal-pixxina barra l-ħinijiet tal-iskola. Involva ruħu b’mod qawwi ħija, Stephen Paris, li huwa wkoll l-viċi-president tal-klabb ta’ Exiles biex dan iseħħ.
Xi tgħidli fuq l-istruttura tal-pixxina ?
Irrid ngħid li Vassallo Group bnew pixxina mill-isbaħ u ma qagħdux lura biex jagħtu faċilitá mill – aqwa bl-iżjed teknoloġija avvanzata li teżisti llum. Mill-bidu inkludewna anke bil-ħsibijiet tagħna fuq din l-istruttura. Għandna pixxina indoor 25 meters x 20 metres bl-ilma msaħħna b’ ventilazzjoni tajba li ma taqtax nifsek meta tkun hemm ġew. Is-saqaf jinfetaħ ukoll biex fis-sajf, jew meta t-temp jippermetti, jidħol id-dawl u r-raġġi tax-xemx. Fuq żewġ naħat tal-pixxina hemm ħġieġ li jagħti għall-faċilitajiet sportivi oħra tal-kumpless inklużi żewġ pitches tal-futbol u għalhekk id-dawl artifiċjali ma jonqosx. Aħna mbagħad investejna fi twapet li jitilgħu u jinżlu permezz ta’ ‘remote control’ biex il-pixxina titgħatta meta ma tkunx qed tintuża biex tiffranka t- telf tas-sħana tal-ilma u tnaqqas l-ispejjeż b‘impatt pożittiv fuq l-ambjent.
X’attivitajiet diversi qed ikollkom bħala klabb ta’ Exiles f’din il-pixxina barra l-ħinijiet tal-iskola?
Il-ġurnata tibda bl-ewwel lezzjonijiet u taħriġ tal-għawm bejn is-6 u t-8 ta’ filgħodu fejn jiġu kemm l-għawwiema kompetittivi tagħna kif ukoll adulti għall-klassi ta’ għawm, imqassmin skont l-abilitá tagħhom, qabel ma jmorru għax-xogħol. Imbagħad nerġgħu nieħdu l-pixxina mit-3 ta ‘ wara nofsinhar sad-9 ta’ bil- lejl fejn hemmhekk nerġgħu noffru taħriġ u klassijiet tal-għawm għall-adulti u tfal dejjem skont l-abilitajiet tagħhom. Wara s-6 ta’ filgħaxija nibdew ukoll it- taħriġ tal-waterpolo fi gruppi varji minn seba’ snin ‘il fuq, ovvjament bit-tim tal-kbar ukoll.
Irrid nghid ukoll illi l-pixxina wkoll qed tintuża biex l-ASA torganizza festivals taż-żgħar u diġá kellna l-ewwel żewġ festivals tal-waterpolo ta’ taħt l-għaxar snin fi Frar u ta’ taħt il-11-il sena f`Marzu, kif ukoll taħriġ tat-timijiet nazzjonali tal-juniors tal-waterpolo u training clinic tal- għawm artistiku. F’Marzu li għadda, ospitajna wkoll ix -short course swim meet għal tfal taħt it- 12-il sena għall-ASA.
Min irid jibda jgħum jew jipprova l-waterpolo, x’irid jagħmel?
Jista’ jsib il-paġna ta’ facebook ta’ Exiles Sports Club u jibgħatilna messaġġ hemmhekk jew jikkuntattjana fuq 99433080 (waterpolo) jew 79929279 (għawm). Aħna noffru prova bl- assessment biex imbagħad niggwidaw lill-atleta liema gruppi naħsbu li jgħodd għalih. Fis-sajf se jkollna lezzjonijiet ukoll filgħodu fost il-ġimgħa kemm tal-għawm kif ukoll tal-waterpolo.
Għaddi messaġġ finali lil dawk it-tfal li jixtiequ jibdew jitħarrġu fil-logħba tal-waterpolo jew lill-ġenituri tagħhom.
Jien ili involut f’dan l-isport għal aktar minn 40 sena. Hija logħba nadifa, kompetittiva u eċitanti u f’Malta għandna livell tajjeb ħafna … żgur li l-waterpolo hu l-aktar team sport ta’ suċċess għal pajjiżna. Biżżejjed ngħid li t-timijiet nazzjonali kollha tagħna (Under 16, 18, kbar nisa u rġiel) huma fost l-aqwa 16 fl-Ewropa. Il-waterpolo jeħtieġ taħriġ u dedikazzjoni imma b’wiċċi minn quddiem ngħid li ħa tieħu pjaċir, tagħmel ħafna ħbieb u tiżviluppa bħala atleta u persuna. Ersaq lejn dan l-isport mill-isbaħ!