Birkirkara …….0
Floriana ………0
Ħamest ijiem wara li ltaqgħu fil-kwarti-finali tal-Izibet FA Trophy fejn Floriana ħarġu rebbieħa bl-iskor ta’ 3-1 fuq Birkirkara, huma reġgħu iltaqgħu f’logħba mill-Kampjonat BOV Premier, fejn din id-darba huma temmew fi draw ta’ 0-0.
Bla dubju, dan huwa riżultat li ma kkuntenta lil ħadd … Floriana biex jibqgħu jisfidaw lil Hibernians għar-rebħ tat-titlu … u Birkirkara biex itemmu fit-tielet post.
Għaldaqstant, il-Pawlisti jistgħu jibdew jiċċelebraw jekk proprju llum joħorġu rebbieħa kontra Gudja United.
Kienu Floriana li ħarġu l-aħjar u wara biss għaxar minuti, Busuttil rċieva ballun fuq ix-xellug imma l-konklużjoni tiegħu ġiet salvata tajjeb minn Sylla.
Disa’ minuti wara, Busuttil reġa’ ttanta xortih dirett minn corner imma falla l-mira bi ftit.
Birkirkara rrispondew bi cross-shot ta’ Scicluna li Kitanov salva tajjeb fl-24 minuta imma żewġ minuti wara, Floriana tilfu ċans tad-deheb meta Cassar għadda l-ballun lejn Ciolacu li minn pożizzjoni tajba ma kkonkludiex.
Fl-34 minuta, il-Karkariżi reġgħu marru qrib meta minn cross ta’ Yankam, Falcone bir-ras impenja lil Kitanov.
Mal-45 minuta, wara cross ta’ Cassar, Busuttil kellu xutt mill-viċin salvat f’żewġ tentattivi minn Sylla biex fil-ħin miżjud, wara azzjoni sabiħa ta’ Busuttil, dan għadda l-ballun lejn Magri Overend li venven xutt b’saħħtu minn barra l-kaxxa li għadda barra.
Ir-ritmu naqas drastikament fit-tieni taqsima bix-xuttijiet lejn il-lasta jkunu ftit li xejn.
Infatti, l-ewwel xutt dirett lejn il-lasti wasal fl-74 minuta minn Kilian Bevis għal Birkirkara li Kitanov salva tajjeb u ħames minuti mit-tmiem, l-istess Bevis kellu xutt minn tarf il-kaxxa li għadda ftit barra biex mas-87 minuta, is-sostitut Ryan Camenzuli ttanta xortih għal Floriana bi cross-shot li għadda ftit għoli minn fuq il-lasti difiżi minn Sylla.
BIRKIRKARA: 12-Amara Sylla, 2-Enzo Ruiz, 6-Yannick Yankam (10-Paul Mbong 71), 8-Claudio Bonanni, 11-Kurt Zammit, 20-Federico Falcone (17-Nathan Cross 86), 21-Ryan Scicluna, 25-Oscar Carniello, 27-Leandro Aguirre, 30-Kilian Bevis, 70-Jeferson Macedo (77-Diego Venancio 71). – Coach: Jonathan Holland
FLORIANA: 33-Georgi Kitanov, 2-Adam Magri Overend, 3-Christian Rutjens, 4-Oualid El Hasni, 5-Zachary Cassar, 10-Ulises Arias (8-Kemar Reid 57), 11-Andrei Ciolacu, 20-Matias Nicolas Garcia, 22-Brandon Paiber (94-Ryan Camenzuli 60), 28-Emiliano Callegari (6-Rumyan Hovsepyan 60), 30-Jan Busuttil – Coach: Gianluca Atzori
REFEREE: Ishmael Barbara
ASS. REFEREES: Roberto Vella, Duncan Spencer
RABA’ UFF: Emanuel Grech
SKORERS: Ħadd
AMMONITI: B. Paiber, C. Rutjens, O. El Hasni, A. Ciolacu (F); K. Zammit, C. Bonanni (B)
