“Forsi nara n-neputija ta’ sena u ħames xhur timxi,” qalet in-nanna ta’ Jasmine Grech, tifla b’kundizzjoni newroloġika, meta ltaqgħet ma’ Bjorn Formosa.
Iddikjara dan Bjorn Formosa stess, f’kitba u ritratt li qasam fuq il-profil tiegħu ta’ Facebook, fejn ħabbar li l-fondazzjoni ALS+ xtrat apparat lil Jasmine sabiex ikun jista’ jgħinha biex tqum fuq saqajha u timxi.
F’intervista li kellhom ftit tal-ġimgħat ilu ma’ dan is-sit, Stefanie u Anthony Grech, il-ġenituri tagħha, spjegawlna li appena rat id-dawl tad-dinja nhar it-3 ta’ Jannar tal-2022, it-tifla ltaqgħet mal-ewwel komplikazzjoni: ma bdietx tieħu nifs sew u spiċċat trasferità fl-NPICU. L-omm spjegat ma’ talk.mt li waqt illi binthom kienet qed tinżamm l-NPICU, it-tobba semmewlhom il-kunċett ta’ neuroplasticity: “Dan ifisser li fejn il-moħħ ikollu l-problemi, partijiet oħra tal-moħħ jieħdu x-xogħol ta’ dawk il-biċċiet li forsi mhux qed jaħdmu kif suppost”.
Hija kompliet tfisser li sabiex tkun possibbli li ssir din il-ħaġa jeħtieġ li l-persuna tkun esposta għat-terapija: “Għalhekk aħna ninvestu ħafna fit-terapiji … huma ħa jgħinuha biex hi tkun tista’ timxi ‘l quddiem,” saħqet l-omm. Infatti, il-ġimgħa għal Jasmine tikkonsisti f’varjetà ta’ terapiji li l-maġġorparti tagħhom jinkludu: il-fiżjoterapija, terapija tat-taħdit, l-occupational therapy, l-early intervention, l-aqua therapy, il-chiropractor, kif ukoll terapija biex tkun tista’ titgħallem tiekol. Aktar informazzjoni dwar Jasmine minn: https://talk.mt/jixtiequ-li-t-terapija-li-bbenefikat-minnha-binthom-tkun-accessibbli-fpajjizna-ghall-familji-maltin/
Jekk tixtieq tgħin, tista’ tagħti d-donazzjoni tiegħek permezz ta’ bank transfer jew Revolut fuq +35677991456, jew hawn.
