Għal darb’oħra ċ-champion renjanti, Novak Djokovic, wera l-poteri supremi tiegħu ta’ rkupru biex jgħaddi minn maratona ta’ ħames sets kontra Francisco Cerundolo u għadda għall-kwarti-finali tal-French Open.
Iżda l-bieraħ ħarġet l-aħbar li Djokovic irtira mit-tournament minħabba injury f’irkopptu tant li seta’ għamel dan fil-logħba stess iżda baqa’ fil-court sal-aħħar.
Intant ilbieraħ sarlu scan u kontra qalbu kellu jħabbar l-irtirar tiegħu għad-diżappunt tal-partitarji numerużi tiegħu.
L-irtirar ta’ Djokovic ifisser li issa huwa Jannik Sinner li se jitla’ fin-numru wieħed fir-rankings tad-dinja.
Is-Serb Djokovic, 37 sena, deher imxekkel minn injury f’irkopptu qabel ma rebaħ 6-1 5-7 3-6 7-5 6-3 kontra l-Arġentin seed numru 23, Cerundolo.
Għat-tieni darba fi tlett ijiem, iċ-champion ewlieni ta’ 24 darba tal-Grand Slam issielet lura u rkupra minn żvantaġġ ta’ żewġ sets għal wieħed.
“F’ħin minnhom ma kontx naf jekk kellix inkompli,” qal Djokovic, li attribwixxa l-injury għall-wiċċ tat-tafal li jiżloq.
Il-logħba tar-raba’ round ma’ Cerundolo bdiet għall-ħabta tal-4.00 pm ħin lokali nhar it-Tnejn, faktar minn 36 siegħa wara li l-konfront preċedenti tiegħu kontra t-Taljan Lorenzo Musetti li spiċċa fit-3.07 tal-Ħadd filgħodu.
Iżda Djokovic xorta kellu r-reżiljenza mentali u fiżika biex jirbaħ konfront ieħor ta’ ħeġġa li dam erba’ sigħat u 39 minuta.
Meta ssiġilla r-rebħa l-aqwa seed faqqa’ tbissima minn qalbu, ipponta lejn sidru u mbagħad lejn il-court f’ċelebrazzjoni.
Kienet it-370 rebħa ta’ Djokovic f’tournament tal-Grand Slam, li ratu jaqbeż lir-rival kbir tiegħu, Roger Federer.
Illum Djokovic kellu jiltaqa’ mas-seba’ seed, in-Norveġiż Casper Ruud, iżda minħabba li rtira dan ingħata walk-over biex sar l-ewwel player maskili li għadda għall-aħħar erbgħa f’Roland Garros.
Ruud mexa ‘l quddiem b’rebħa fuq erba’ sets ta’ 7-6 (8-6) 3-6 6-4 6-2 fuq it-12-il seed, l-Amerikan Taylor Fritz.
Alexander Zverev għeleb lil Holger Rune liema logħba spiċċat fis-1.40 am ħin lokali f’Pariġi biex wasal għall-kwarti-finali b’rebħa eċċitanti ta’ ħames sets.
Ir-raba’ seed kellu bżonn erba’ sigħat u 40 minuta biex għeleb lid-Daniż Rune 4-6 6-1 5-7 7-6 (7-2) 6-2.
Zverev se jiffaċċja lil Alex de Minaur fl-aħħar tmienja wara li l-Awstraljan għeleb lill-ħames seed Daniil Medvedev aktar kmieni nhar it-Tnejn.
It-Taljan Jannik Sinner kompla jfittex it-tieni Grand Slam tal-2024 billi għeleb b’mod komdu lill-Bulgaru seed numru 10, Grigor Dimitrov, 6-2 6-4 7-6 (7-3) biex wasal sas-semi-finali.
It-tieni seed Sinner qatt ma kien mar lil hinn mill-istadju tal-kwarti-finali f’Roland Garros iżda lbieraħ deher f’kontroll totali
Sinner se jiffaċċja t-tielet seed Spanjol Carlos Alcaraz jew id-disa’ seed, il-Grieg Stefanos Tsitsipas, li lagħbu aktar tard ilbieraħ filgħaxija, fl-aħħar erbgħa.
SWIATEK TIRBAĦ FI 28 MINUTA
Il-mistoqsija li waslet fil-maġġuri tat-tafal hija: min jista’ jwaqqaf lil Iga Swiatek f’Roland Garros?
Ħadd mhu eqreb li jwieġeb wara prestazzjoni imperjuża oħra min-numru wieħed tad-dinja ta’ 23 sena.
Minn mindu għelbet lil Naomi Osaka fit-tieni round, Swiatek għolliet il-livell tagħha. Hija kellha bżonn biss 40 minuta biex eliminat lil Anastasia Potapova 6-0 6-0 fl-aħħar 16 u kompliet fejn ħalliet b’bagel ta’ 28 minuta kontra ċ-Ċeka Marketa Vondrousova.
Vondrousova li kienet runner-up f’Roland Garros fl-2019, u hija ċ-champion renjanti ta’ Wimbledon, iżda Swiatek operat fuq livell differenti.
Wara li għal ftit żmien ġiet taħt pressjoni fuq is-service fuq 1-1, Swiatek żammet għal 2-1 u reġgħet ibbrejkjat għal 3-1 fi triqitha biex tirrepeti l-finali ta’ sentejn ilu kontra Gauff fl-aħħar erbgħa.
It-tielet seed, l-Amerikana Coco Gauff, waslet sas-semi-finali ta’ dan l-Open wara li rkuprat minn set minn taħt biex għeleb lil Ons Jabeur tat-Tuneżija f’konfront assorbenti.
Gauff, 20 sena, uriet il-maturità u l-mentalità tagħha biex rebħet 4-6 6-2 6-3 f’Roland Garros.
Iċ-champion tal-US Open se tilgħab kontra l-aqwa seed Swiatek, li għelbitha fil-finali tal-2022, fl-aħħar erbgħa għada l-Ħamis.
Swiatek kompliet it-tentattiv tagħha għat-tielet titlu konsekuttiv f’Pariġi b’rebħa ta’ 6-0 6-2 fuq il-ħames seed, Vondrousova.
Wara set tal-ftuħ mill-aqwa mit-tmien seed Jabeur, Gauff kompliet temmen fil-logħba tagħha u ħadet vantaġġ mit-tnaqqis fil-livell tal-avversarja tagħha.
Gauff ma setgħetx tikkonverti match point fuq is-service ta’ Jabeur f’5-2 fis-set deċiżiv, u rnexxielha ssalva break point fuq 5-3, qabel ma qabżet il-linja tat-tmiem meta l-avversarja tagħha tefgħet ballun minn fuq rasha fit-tul.
