Ġenituri bil-kustodja tat-tfal f’“martirju”

“Għandi l-kustodja u hemm digriet tal-Qorti biex lit-tifel ma jeħdux fejn is-sieħba ġdida li għandu minħabba problemi marbutin ma’ vizzji. Dan jinkiser regolarment u minkejja li tkellimt mal-Pulizija jgħiduli li ma jistgħu jagħmlu xejn għax huma jidħlu biss fejn jirigwarda manteniment u aċċess. Min qed ibati minħabba dan? It-tifel u jien miegħu”. 

Omm oħra tgħidilna li “r-raġel hu marbut b’digriet li meta t-tifel ikun għandu jrid itih attenzjoni massima. Jispiċċa joħroġ mal-ħbieb, jixorbu ‘l hawn u ‘l hemm u t-tifel miegħu. Nirrapporta imma jgħiduli li f’każi hemm ma jidħlux”.

Ma’ dawn mbagħad hemm każijiet fejn ġenitur li għandu l-kustodja jekk b’xi mod jonqos milli it-tfal jgħaddu fil-ħin stipulat mill-Qorti għand il-ġenitur l-ieħor li għandu aċċess jistgħu jittieħdu passi kriminalment kontrieh, waqt li jekk min għandu aċċess għat-tfal imma mhux il-kustodja, jekk ma jirritornahomx fil-ħin jew addirittura jabbuża u jżommhom għandu, il-Pulizija qed jgħidu li ma jistgħux jieħdu passi, minkejja li min ikollu l-kustodja qed jingħata raġun mill-istess Pulizija.   Minn stħarriġ li għamlet talk.mt fejn fl-aħħar jiem tkellimna ma’ diversi ġenituri li għandhom kustodja u għaddejjin bi problemi simili, jidher li l-każijiet fejn il-ħinijiet tal-aċċess ma jinżammux qed jiżdiedu u dan għax dawk li jkollhom aċċess u mhux il-kustodja jafu li jekk ma jirritornawx it-tfal għand min ikollu l-kustodja m’hemmx passi kriminali kontrihom.

Waħda mill-problemai li qed tifni lil ħafna ġenituri li għandhom il-kustodja hi dik li uliedhom ma jiġux ritornati fil-ħin. Tkellmu magħna ġenituri fejn uliedhom ġew ritornati ġurnata jew aktar wara li suppost kellhom ikunu ritornati għand il-ġenitur li għandu l-kustodja. 

Omm li tkellmet magħna qaltilna li “l-kustodja qiegħda għandi. Jien nemmen li t-tifel għandu bżonn kemm lil ommu u kemm lil missieru, allavolja qed ngħixu ħajja separata minn xulxin.  Qiegħda f’sitwazzjoni li iħossha inġusta għall-aħħar. Jien dejjem rajt li jmur għand missieru fil-ħin stipulat. Konxja li jekk ma nagħmilx dan jien skont il-liġi jistgħu jittieħdu passi kriminalment kontriha. Ma nara xejn ħażin fuq hekk.  Filfatt meta nkun ma niflaħx u ma nkunx nista’ nieħdu, jkolli nagħmel ċertifikat mingħand it-tabib.  Biss imbagħad, in-naħa l-oħra mhix marbuta bħali li għandi l-kustodja. Ir-raġel għandu l-aċċess iżda dan meta jfettillu ma jirritornahx fil-ħin u jġibu l-għada jew x’ħin ifettillu. Għal min għandu aċċess biss u mhux kustodja, jekk ma jsegwix mal-ħinijiet, m’hemmx stipulati passi kriminali. Nemmen li din hi inġustizzja li għandha tiġi rranġata billi l-liġi tinbidel. Jekk min ikollu l-kustodja għandu jinżamm kriminalment responsabbli jekk it-tfal ma jeħodhomx għand il-parti l-oħra, l-istess għandu jiġi għan-naħa l-oħra jekk dawn ma jsegwux. Tmur l-għassa u jgħidulek li ma jistgħu jagħmlu xejn”.

Tgħidilna li “nispiċċa ngħaddi minn martirju. Tistenna u tara li ma jġibhomx. Iċċempillu u ma jwiġbekx.  iċċempel l-għassa u jippruvaw jgħinuk imma jgħidulek li ma jistgħu jagħmlu xejn f’każijiet oħra. Għidli x’jibqa’ fik? Nispiċċa f’tensjoni u ansjetà kbira”.

Talk.mt tkellmet mal-Avukat Andy Ellul, li hu ukoll konsulent mal-Minsiteru tal-Familja. Meta mistoqsi dwar din is-sitwazzjoni inġusta qalilna li “naqbel perfettament li għandha tiġi emendata l-liġi f’dan ir-rigward. Ngħid li għandha tiġi emendata kemm dik ċivili u kemm dik kriminali. Qed ngħid dik ċivili wkoll għax minkejja li hemm rimedju d-dewmien fil-qrati jista’ jkun ta’ detriment qawwi. Naqbel ukoll ukoll li iva din is-sitwazzjoni qed toħloq tbatija inutli kemm lit-tfal u anke lill-ġenituri.”  Hu qalilna li dawk li jkollhom l-aċċess u mhux il-kustodja, u ma jirritornawx it-tfal fil-ħin, anke dawn għandhom jinżammu responsabbli kriminalment.