Ġermaniża ta’ 26 sena residenti Tas-Sliema, ġiet arrestata wara li l-investigazzjonijiet mill- Pulizija tal-Iskwadra ta’ Konta d-Droga flimkien mad-Dipartiment tad-Dwana, irriżultaw li l- mara impurtat droga biex allegatament tiġi traffikata.
L-investigazzjoniet bdew wara li fl-aħħar jiem id-Dipartiment tad-Dwana infurma lil Pulizija ta’ Kontra d-Droga li kienu waslu żewġ pakketti li kien fihom erba’ vażetti tal-ħġieġ b’sustanza allegatament ħaxixa tal-cannabis. Il-pakketti kienu indirrizati lil mara Ġermaniża.
Fuq din l-informazzjoni, illum waranofsinhar, il-Pulizija esegwit il-mandat t’arrest tal-mara. Hi ġiet arrestata f’appartament f’Tas-Sliema u minn tfittxija li saret, il-Pulizija sabet sitt vażetti oħra mimlija ukoll b’ sustanza allegatament ħaxixa tal-cannabis, oġġetti relatati mal-użu tad- droga u madwar €8000 fi flus kontanti.
Bil-każ ġie infurmat il-Maġistrat tal-Għassa Dr Ian Farruġia LL.D li ordna li ssir inkjesta u ħatar diversi esperti sabiex jassistuh.
Il-mara qed tinżamm fil-lock-up tal-Pulizija fil-Furjana u mistennija titressaq il-Qorti b’arrest fil-jiem li ġejjin.
L-investigazzjonijiet tal-Pulizija għadhom għaddejjin.
