Waqt attività politika fil-Gudja, il-Kap tal-Partit Nazzjonalista Bernard Grech qal li l-partit immexxi minnu jibqa’ miegħek biex jagħtik is-soluzzjonijiet għax jemmen li għandu l-obbligu biex jagħmel dan.
Grech qal li l-Partit Nazzjonalista se jkun qiegħed jindirizza l-għoli tal-ħajja biex il-paga u l-pensjonijiet iservu iżjed mingħajr il-bżonn li taħdem sigħat twal.
“Imma biex nagħmlu dan hemm bżonn li inti tagħtina l-fiduċja”, kompla jgħid Grech filwaqt li appella lil dawk li qegħdin jikkunsidraw biex ma jivvutawx, biex jerġgħu jaħsbuha u pprova jikkonvinċihom biex jivvutaw lill-Partit Nazzjonalista.
Mill-ġdid Grech qal li l-Partit Laburista għadu mingħajr programm elettorali u staqsa għaliex il-Prim Ministru sejjaħ elezzjoni ġenerali daqshekk malajr meta ma kienx preparat.
“Vot lill-Partit Nazzjonalista biss jista’ jagħtik is-serħan il-moħħ li inti u wliedek ikollkom kwalità ta’ ħajja aħjar b’opportunitajiet aħjar”, tenna Grech.