Għaxar snin ilu r-raħal ta’ Ħal Qormi tbikkem bit-traġedja fejn spiera ħasdet il-ħajja taż-żagħżugħ ta’ 17-il sena Charlon Borg.
L-inċident seħħ għall-ħabta tas-2.00p.m. meta Charlon, flimkien ma’ missieru, kienu qed ibattlu xi materjal fi spiera viċin il-kamra tan-nar ta’ San Ġorġ f’Ħal Qormi fl-akwati magħrufa bħala tal-bonċ.
Mill-ewwel investigazzjonijiet li saru jidher li meta kienu qed ibattlu dan il-materjal waqgħet it-tappiera ġo l-ispiera u ż-żagħżugħ nieżel għaliha.
L-eku ta’ din it-traġedja għadu jidwi sal-lum il-ġurnata fejn bosta ħbieb li kienu jafuh illum sellmu l-memorja tiegħu.
Fost l-oħrajn, wieħed mill-ħbieb tal-qalb tiegħu, George Falzon, qal li jħossu n-nuqqas tal-preżenża tiegħu hekk kif fost l-oħrajn jimmisjawh f’kull ikla, f’kull BBQ, f’kull wirja, f’kull festa.
“Imma hemm aħjar minn hawn isfel. Hemm qiegħed fejn dak li ħabbejt u ħdimt għalih, imħaddan u mgeżwer mal-mantell ħamrani,” kiteb George fuq il-midja soċjali.
Żied jgħid: “Ibqa’ żomm ħarstek fuq il-familja tiegħek ħabib, fuq iż-żgħażagħ membri fis-sessjoni li int kont tagħmel parti minnha, u fuqna ilkoll devoti ta San Ġorġ li ħdimna u armajna spalla ma’ spalla miegħek.”
Charlon kien attiv fil-Festa ta’ San Ġorġ u kien jgħin fl-armar tal festa. Kien ukoll membru tal-Arċikonfraternità lil Madonna tar-Rużarju.
Ħbieb li kienu jafuh iddeskrivewh bħala żagħżugħ qalbu tajba u li ma kien jaf jgħid le lil ħadd.
