(Minn dramm li mhux se jinkiteb.)
Jidħol NETANJAĦU, PM Iżraeljan u KONSULENTI fdati. Għadu kemm wasal minn Washington.
NETANJAĦU-Ninsabu protetti minn kull sorvelja?
KONSULENT(1)-Assolutament. F’dal-bunker, l-anqas is-CIA m’għandha tarf kif tissemmagħlna.
NETANJAĦU-Irrid ngħidilkom fejn ninsabu tassew wara din l-aħħar żjara tiegħi f’Washington. Dwar Trump.
KONSULENT(2)-Iva, Prim. Se jagħtina kollox fuq platt.Kemm mort tajjeb miegħu!
NETANJAĦU-Miġnun perfett, kif dejjem fhimt. Imma l-aħħar ġennata tiegħu taqdina sew. Jeħtieġ inkomplu fuqha. Minn tmenin fil-mija tal-binjiet meqruda f’Gaza, ejja neqirdu sal-ħamsa u disgħin fil-mija. Malajr kemm jista’ jkun.
KONSULENT(3)-Imma għaliex din l-għaġla?
NETANJAĦU-Qabel dak il-miġnun jibdel fehmtu.
KONSULENTI (1), (2), (3)- Mhux se jibdilha!
NETANJAĦU-E le? U jekk il-Qatari jew is-Sawdi joffrulu biex jibni Riviera grandjuża fil-Golf Għarbi, u jħallsu kollox huma? Qabel jibdel ħsiebu, l-bombi kollha li jibgħatulna minn Washington inferrgħuhom fuq il-Gaza.
KUMMISSJONI KONTRA L-KORRUZZJONI
Hijiex ħaġa stramba kif fid-diskors li qed isir dwar inkjesti maġisterjali (u l-bqija) biex jiġu żvelati prattiċi amministrattivi u politiċi żgarrati, kważi l-anqas darba ħadd ma semma l-Kummissjoni Kontra l-Korruzzjoni? Issa bħala istituzzjoni, din suppost tinsab fl-ewwel linja tal-ħidma kontra l-abbużi fl-eżerċizzju tal-poter statali.
Dan-nuqqas hu konferma oħra li l-Kummissjoni mhijiex għodda effettiva. Dejjem hekk kien, mill-bidu nett tagħha. Xorta amministrazzjonijiet suċċessivi taż-żewġ partiti baqgħu jqisuha istituzzjoni li trid tinżamm ħajja. Min jaf għaliex?!
DUN VICTOR
L-ewwel laqgħa li kelli miegħu ġrat fis-sena 1966. Kien Rettur tas-Seminarju u membru tal-Kunsill tal-Università. Kont ma’ grupp ta’ studenti li pprovajna nwaqqfu għaqda universitarja biex tippromwovi d-diskors ħieles. Kellna bżonn il-konferma tal-Kunsill biex l-għaqda titwaqqaf u tingħata fondi. Bħala parti minn ħidma biex inġibu dil-konferma, mort inkellmu. Spjegajtlu x’ridna nagħmlu. Semagħni b’attenzjoni u kortesija. Wegħedni l-appoġġ. Naturalment ma baqax jiftakar din il-laqgħa. Jien iva.
Snin wara, ltqajna kemm-il darba fil-jiem ta’ gradwazzjoni taċ-ċentru tal-Caritas għal dawk li jkunu segwew il-programm li jgħinhom jirbħu l-vizzju tad-droga. Kien jolqtok il-ferħ tiegħu għas-suċċess miksub matul is-sena li tkun għaddiet. Kont naqbel mat-tolleranza żero tal-Caritas għad-droga, kull fejn titfaċċa.
Fis-sena 1998, iddiskutejt miegħu kif is-servizzi privati u statali ta’ kontra d-droga setgħu jaħdmu flimkien skond pjan wieħed nazzjonali. Is-servizz privat kien kollu tal-Knisja. Xtaqt li jkun parti b’mod eżekuttiv fit-tħejjija u t-twettiq tal-ħidma flimkien mas-servizz statali, imma bi qbil minn qabel li fil-ħidma kollha jinżamm orjentament sekulari, mhux konfessjonali. Qabel minnufih.
Dun Victor Grech jixraqlu kull ġieħ bħala protagonist qalbieni f’pajjiżna ta’ ħidma ffokata fuq urġenzi soċjali mwettqa skond valuri progressivi.